Një studim i ri nga Mbretëria e Bashkuar sugjeron se mënyra se si kalojmë kohën ulur mund të jetë po aq e rëndësishme sa edhe sasia totale e qëndrimit ulur, veçanërisht kur lidhet me rrezikun e kancerit. Studiuesit analizuan të dhëna nga mbi 91 mijë persona në ‘UK Biobank’ dhe zbuluan se çdo orë shtesë e kaluar në ulje të pandërprerë lidhej me rreth 9–10% rritje të rrezikut për vdekje nga kanceri. Në të kundërt, kur periudhat e qëndrimit ulur ndërpriteshin me lëvizje, rreziku ulej ndjeshëm.
Sipas rezultateve, zëvendësimi i vetëm një ore uljeje të zgjatur me aktivitet të lehtë fizik, si ecja, lidhej me rreth 12% ulje të rrezikut të vdekjes nga kanceri, ndërsa aktiviteti më intensiv mund të sillte edhe përfitime më të mëdha, deri në 22% ulje të rrezikut, shkruan burimi Medical News Today transmeton Gazeta Shneta.
Studiuesit e ndanë sjelljen sedentare në dy kategori: ulje e pandërprerë për të paktën 30 minuta dhe ulje e ndërprerë nga lëvizja. Ata gjetën se ulja e zgjatur lidhej me rritje të incidencës së kancerit dhe me rrezik më të lartë për lloje të lidhura me obezitetin dhe diabetin e tipit 2, ndërsa ndërprerja e saj me aktivitet fizik lidhej me rezultate më të mira shëndetësore.
Të dhënat treguan gjithashtu se edhe zëvendësimi i pak minutave qëndrimi ulur me aktivitet të fuqishëm fizik mund të ndikojë në uljen e rrezikut.
Ekspertët shpjegojnë se sjellja sedentare mund të rrisë peshën trupore dhe inflamacionin, faktorë që lidhen ngushtë me zhvillimin e kancerit, si dhe mund të ndikojë në çrregullime hormonale që rrisin rrezikun për kancere të ndjeshme ndaj hormoneve. Ata theksojnë se edhe ndërprerje të shkurtra të uljes, si ngritja çdo 15 minuta për pak lëvizje, mund të kenë efekt mbrojtës.
Megjithatë, studiuesit theksojnë se këto rezultate janë observacionale dhe nuk provojnë shkakësi të drejtpërdrejtë. Edhe pse lidhja është e fortë, nevojiten studime të tjera për ta konfirmuar.
Në përgjithësi, gjetjet sugjerojnë se shmangia e qëndrimit të gjatë ulur dhe përfshirja e lëvizjes së shpeshtë gjatë ditës mund të jetë një strategji e thjeshtë për uljen e rrezikut të kancerit. /Gazeta Shneta/