Një studim i ri ka ngritur shqetësime për mënyrën se si disa platforma online përshkruajnë barnat e grupit GLP-1, duke gjetur se në shumë raste pacientët marrin receta me mbikëqyrje minimale mjekësore.
Hulumtimi, i realizuar nga studiues të Shkollës së Mjekësisë në Universitetin Yale, analizoi procesin e marrjes së recetave online për barna GLP-1, të cilat përdoren kryesisht për trajtimin e diabetit të tipit 2 dhe menaxhimin e peshës.
Studiuesit krijuan një profil të simuluar pacienti që plotësonte kriteret për marrjen e një recete dhe kontaktuan 49 platforma online gjatë periudhës gusht-dhjetor 2025.
Nga këto platforma, 45 ofruan recetë për ilaçin, ndërsa 34 prej tyre e dërguan barnën me postë.
Megjithatë, analiza tregoi se shumica e faqeve nuk kërkonin një konsultë të drejtpërdrejtë me mjekun. Vetëm 13 platforma kërkuan një vizitë me video me profesionist shëndetësor, ndërsa vetëm tri prej tyre kërkuan një bisedë telefonike para përshkrimit të terapisë.
Në shumë raste, vendimi për dhënien e recetës bazohej vetëm në pyetësorë online, të cilët sipas studiuesve mund të mos mbledhin të dhëna të mjaftueshme për historinë shëndetësore dhe faktorët socialë të pacientit.
Hulumtuesit vunë në dukje se disa receta u miratuan brenda pesë minutash ose më pak, madje edhe në raste kur mungonin dokumente ose fotografi të kërkuara.
Sipas autorëve të studimit, platformat online kanë ndihmuar në rritjen e qasjes te barnat GLP-1, por disa prej tyre mund të vendosin shpejtësinë e përshkrimit mbi një vlerësim të plotë mjekësor.
Ata paralajmërojnë se mungesa e përfshirjes së mjekut, veçanërisht kur bëhet fjalë për forma të përgatitura të barnave GLP-1, mund të rrisë rrezikun për pasoja shëndetësore dhe financiare për pacientët.