Problemet me fertilitetin nuk lidhen vetëm me gratë, pasi në një pjesë të rasteve shkaktarët mund të jenë edhe te partneri mashkull.
Kështu thotë drejtori i Klinikës së Gjinekologjisë dhe Obstetrikës në QKUK, Dr. Zef Ndrejaj, i cili thekson se vlerësimi i të dy partnerëve është i domosdoshëm kur një çift përballet me vështirësi për të arritur shtatzëninë.
Në një intervistë për Gazetën Shneta, Ndrejaj tha se infertiliteti duhet të shihet si problem i çiftit dhe jo vetëm i gruas.
“Infertiliteti nuk është vetëm problem i gruas. Nuk mund të themi se është 50 me 50, por kemi shumë raste kur shkaktari është burri,” u shpreh ai.
Sipas tij, te burrat vlerësimi mund të bëhet përmes analizave specifike, ndërsa një nga ekzaminimet kryesore është spermograma.
“Te burrat me një analizë mund të sqarohen shumë gjëra. Me një spermogram mund të shihet gjendja dhe më pas trajtimi vazhdon te urologu,” tha Ndrejaj.
Ndërsa te gratë, sipas tij, shkaqet e infertilitetit mund të jenë më të shumta dhe më komplekse.
“Te problemet femërore kemi probleme të shumta. Mund të kemi probleme organike, ciste, mioma, mund të jenë probleme të lindura, moszhvillim i ndonjë organi të mitrës apo vezoreve,” u shpreh Ndrejaj.
Ai përmendi edhe ndikimin e infeksioneve seksualisht të transmetueshme, të cilat nëse nuk trajtohen në kohë mund të shkaktojnë komplikime.
“Infeksionet seksualisht të transmetueshme, nëse nuk trajtohen ose nëse zgjasin shumë, mund të shkaktojnë mbyllje të kanaleve dhe si pasojë infertilitet,” tha ai.
Ndrejaj theksoi se një pjesë e problemeve që ndikojnë në fertilitet mund të trajtohen dhe nuk kërkojnë domosdoshmërisht fertilizim të asistuar.
“Shumica e rasteve janë të trajtueshme. Këto pengesa që shkaktojnë infertilitet, me një intervenim mund të çojnë deri te një shtatzëni edhe pa IVF,” deklaroi ai.
Sipas tij, fertilizimi i asistuar nevojitet kryesisht në rastet kur ka probleme më të rënda, si dëmtime apo bllokime të kanaleve, çrregullime të theksuara hormonale apo probleme të rënda me spermën.
“IVF na nevojitet kur kemi dëmtim apo mbyllje të kanaleve, kur ka probleme hormonale të vezoreve dhe është e pamundur të krijohet vetvetiu qeliza vezë. Po ashtu, te disa raste të infertilitetit mashkullor duhet të merren qelizat drejtpërdrejt nga testisi,” tha Ndrejaj.
Ai shtoi se në raste të veçanta, kur mungojnë plotësisht qelizat spermatozoide, mund të kërkohen edhe alternativa të tjera të trajtimit.
Ndrejaj apeloi që çiftet që kanë vështirësi për të arritur shtatzëninë të kërkojnë vlerësim mjekësor për të dy partnerët, pasi identifikimi i hershëm i shkakut mund të ndikojë në zgjedhjen e trajtimit.