Hedhja e menjëhershme në një liqen, lumë apo det me ujë të ftohtë gjatë një vale të nxehti mund të shkaktojë një reagim të rrezikshëm të organizmit, të njohur si “shoku nga uji i ftohtë”, i cili rrit ndjeshëm rrezikun e mbytjes. Ekspertët këshillojnë që trupi të futet gradualisht në ujë, ndërsa hidratimi i mirë është po ashtu thelbësor për të ulur rrezikun.
Paralajmërimi vjen pasi gjatë valës së fundit të të nxehtit në Francë, më shumë se 70 persona humbën jetën nga mbytja, ndërsa kërkonin freski në ujë.
Edhe kur temperatura e ajrit është shumë e lartë, liqenet dhe lumenjtë mund të mbeten të ftohtë, pasi uji ngrohet shumë më ngadalë se ajri. Ky kontrast i madh i temperaturës mund të shkaktojë reagime të menjëhershme të trupit, shkruan Very Well Health transmeton Gazeta Shneta.
Sipas ekspertëve, zhytja e papritur në ujë të ftohtë mund të shkaktojë frymëmarrje të shpejtë dhe të pakontrolluar, marrje të menjëhershme të frymës, madje edhe probleme me ritmin e zemrës. Në momentin e parë, personi mund të thithë ujë pa dashje, duke rritur rrezikun e mbytjes brenda pak minutash.
Ekspertët paralajmërojnë gjithashtu se dehidratimi, i zakonshëm gjatë vapës, mund ta përkeqësojë situatën. Kur organizmi humbet lëngje, ulet vëllimi i gjakut dhe zemra duhet të punojë më shumë për të ruajtur tensionin arterial. Si pasojë, sistemi kardiovaskular bëhet më i ndjeshëm ndaj ndryshimeve të menjëhershme të temperaturës.
Personat me sëmundje të zemrës ose probleme të qarkullimit të gjakut duhet të shmangin veçanërisht hedhjen e menjëhershme në ujë të ftohtë.
Për të shmangur rrezikun, specialistët rekomandojnë të futeni gradualisht në ujë. Fillimisht lagni këmbët, qafën ose kyçet e duarve, duke i dhënë trupit kohë të përshtatet me temperaturën. Kjo ndihmon në kontrollimin e frymëmarrjes dhe zvogëlon mundësinë e reagimit të papritur të organizmit.
Edhe gjatë temperaturave ekstreme, noti dhe freskimi në ujë mbeten mënyra të mira për të ulur temperaturën e trupit, por vetëm nëse bëhen me kujdes.
Ekspertët këshillojnë të mos hidheni menjëherë në ujë, të kontrolloni frymëmarrjen dhe, veçanërisht në minutat e para, të mbani kokën mbi sipërfaqen e ujit për të shmangur rrezikun e mbytjes. /Gazeta Shneta/