Rrahjet e çrregullta ose të forta të zemrës janë një simptomë që shumë gra mund ta përjetojnë gjatë shtatzënisë. Ndryshimet natyrore që ndodhin në trup gjatë kësaj periudhe mund të ndikojnë në sistemin kardiovaskular dhe të shkaktojnë ndjesinë e “dridhjeve”, përshpejtimit, kapërcimit të rrahjeve ose goditjeve më të forta të zemrës. Në shumicën e rasteve, këto palpitacione nuk janë shqetësuese, por disa prej tyre mund të kërkojnë vlerësim mjekësor.
Gjatë shtatzënisë, sasia e gjakut që qarkullon në trup rritet me rreth 50%, ndërsa rrahjet e zemrës shtohen zakonisht me 10 deri në 20 rrahje në minutë. Ndryshimet hormonale dhe rritja e mitrës ndikojnë gjithashtu në pozicionin e zemrës, duke e zhvendosur atë më lart në kraharor. Këto ndryshime i shtojnë punën zemrës dhe mund të shkaktojnë palpitacione, shkruan burimi Very Well Health transmeton Gazeta Shneta.
Megjithatë, gratë shtatzëna duhet të kërkojnë këshillën e mjekut nëse përjetojnë simptoma si marramendje, dhimbje gjoksi, vështirësi në frymëmarrje, të fikët, djersitje, kollë me gjak, rrahje zemre që zgjasin më shumë se 30 sekonda ose puls në qetësi mbi 100 rrahje në minutë.
Rreziku për palpitacione më serioze është më i lartë te gratë me probleme të mëparshme të zemrës, aritmi, sëmundje të lindura të zemrës, sëmundje strukturore të zemrës ose kardiomiopati peripartum, një gjendje ku muskuli i zemrës dobësohet gjatë ose pas shtatzënisë.
Në raste të lehta, mjeku mund të rekomandojë ndryshime në stilin e jetesës, si kufizimi i kafeinës, shmangia e duhanit dhe alkoolit dhe përdorimi i teknikave të relaksimit. Kur palpitacionet janë më serioze, mund të nevojiten ekzaminime si elektrokardiograma (EKG) dhe trajtime specifike.
Nëse rrahjet e forta të zemrës vazhdojnë edhe pas lindjes, rekomandohet konsultimi me një kardiolog për të përcaktuar shkakun dhe trajtimin e duhur. /Gazeta Shneta/