Një vajzë 12-vjeçare nga Anglia iu nënshtrua gjashtë cikleve të kimioterapisë dhe trajtimeve të tjera intensive për shtatë vjet, pasi u diagnostikua gabimisht me një sëmundje të rrallë autoimune.
Sipas raportimit, Faye Condon u diagnostikua në moshën pesëvjeçare me dermatomiozit juvenil, një sëmundje inflamatore e rrallë që prek muskujt dhe lëkurën. Si pjesë e trajtimit, ajo mori kimioterapi, barna imunosupresive dhe iu nënshtrua procedurave të shumta mjekësore, shkruan People, transmeton Gazeta Shneta.
Megjithatë, shtatë vjet më vonë, testet gjenetike zbuluan se diagnoza ishte e gabuar. Mjekët konstatuan se Faye vuante nga distrofia muskulare Emery-Dreifuss e tipit 2 (EDMD), një sëmundje e rrallë gjenetike që shkakton dobësi progresive të muskujve dhe mund të prekë edhe zemrën.
Nëna e saj, Christina Condon, tha se kishte ngritur vazhdimisht dyshime për diagnozën fillestare dhe kishte kërkuar hetime të mëtejshme, por shqetësimet e saj nuk u morën parasysh. Ajo e përshkroi përvojën si shkatërruese për familjen, duke theksuar se vajza iu nënshtrua trajtimeve të rënda që në fund rezultuan të panevojshme.
Aktualisht, Faye përdor karrocë me rrota dhe ventilim gjatë natës për shkak të sëmundjes së saj gjenetike. Familja ka paraqitur ankesë zyrtare ndaj institucioneve shëndetësore dhe kërkon sqarime për gabimin diagnostik, ndërsa autoritetet kanë nisur shqyrtimin e rastit. /Gazeta Shneta/