Kirurgu torakal në Qendrën Klinike Universitare të Kosovës (QKUK), Shqiptar Demaçi, ka ngritur shqetësimin për shtimin e rasteve të plagosjeve me armë të ftohta, duke bërë thirrje për më shumë kujdes dhe shmangie të konflikteve.
Përmes një postimi publik, Demaçi ka bërë të ditur se vetëm gjatë 24 orëve të fundit në QKUK janë trajtuar tre persona të plagosur me thika dhe brisqe në Qendrën Emergjente, Reanimacion dhe Klinikën e Kirurgjisë Torakale.
Sipas tij, njëri prej rasteve ishte një 18-vjeçar, i cili u pranua në gjendje të rëndë shoku hemorragjik, pasi kishte humbur rreth 2.5 litra gjak nga plagët në kraharor. I riu u transportua me kohë nga ekipet e urgjencës me autoambulancë dhe iu nënshtrua një ndërhyrjeje urgjente kirurgjikale.
Demaçi theksoi se, falë reagimit të shpejtë të ekipeve të Qendrës Emergjente, Reanimacionit, Kirurgjisë Torakale dhe Mjekimit Intensiv, pacienti u menaxhua me sukses.
Në fund, kirurgu torakal u bëri apel qytetarëve, veçanërisht të rinjve, që të shmangin sjelljet agresive dhe përdorimin e armëve të ftohta, duke paralajmëruar se raste të tilla mund të përfundojnë me pasoja fatale.