Instituti Evropian Eksperimental për Parashikimin e Stuhive (ESTOFEX) ka përfshirë Kosovën në nivelin 3 të rrezikut për mot të ashpër gjatë ditës së sotme. Ky është niveli më i lartë në sistemin e vlerësimit të institutit dhe shpallet vetëm në raste kur kushtet atmosferike mund të favorizojnë zhvillimin e stuhive të forta, sipas burimit Meteo Balkan.
ESTOFEX harton parashikimet duke kombinuar analizën e meteorologëve me modelet numerike të motit. Krahas hartës së rrezikut, instituti publikon edhe analiza që shpjegojnë fenomenet e mundshme, si breshëri, erërat e fuqishme, reshjet intensive dhe, në raste të veçanta, mundësinë për tornado, transmeton Gazeta Shneta.
Përveç Kosovës, në nivelin 3 të rrezikut janë përfshirë edhe pjesë të verilindjes së Italisë, Deti Adriatik, Dalmacia në Kroaci, Mali i Zi, jugu i Bosnjë e Hercegovinës dhe veriu i Shqipërisë.
Sipas vlerësimit të ESTOFEX-it, gjatë orëve të pasdites dhe mbrëmjes mund të krijohen kushte për stuhi të fuqishme lokale, të shoqëruara me reshje intensive, breshër të madh dhe erëra të forta. Në disa zona nuk përjashtohet as mundësia e zhvillimit të tornadove, megjithëse ky mbetet një skenar me probabilitet më të ulët.
Meteorologët theksojnë se këto dukuri janë karakteristike për stinën e verës, por niveli i parashikuar i paqëndrueshmërisë atmosferike është më i lartë se zakonisht.
Megjithatë, niveli i rrezikut nuk do të thotë se fenomenet e motit të ashpër do të prekin çdo zonë. Nëse zhvillohen, ato pritet të kenë karakter lokal. Për këtë arsye, rekomandohet që qytetarët të ndjekin njoftimet e institucioneve përgjegjëse dhe parashikimet më të fundit të motit. /Gazeta Shneta/