Njerëzit me depresion kanë temperatura më të larta të trupit, duke sugjeruar se mund të ketë përfitime për shëndetin mendor nga ulja e temperaturave të atyre me këtë çrregullim, zbuloi një studim i ri i UC San Francisco.
Studimi i publikuar në “Scientific Reports”, nuk tregon nëse depresioni rrit temperaturën e trupit apo një temperaturë më e lartë shkakton depresion. Nuk dihet gjithashtu nëse temperatura më e lartë e trupit e vërejtur tek njerëzit me depresion pasqyron uljen e aftësisë për t’u vetë-ftohur, rritjen e gjenerimit të nxehtësisë nga proceset metabolike ose një kombinim të të dyjave, shkruan burimi Medical Xpress përcjell Gazeta Shneta.
Studiuesit analizuan të dhënat nga më shumë se 20,000 pjesëmarrës ndërkombëtarë të cilët mbanin një pajisje që mat temperaturën e trupit dhe gjithashtu vetë-raportuan temperaturat e trupit të tyre dhe simptomat e depresionit çdo ditë. Studimi shtatë-mujor filloi në fillim të vitit 2020 dhe përfshinte të dhëna nga 106 vende.
Rezultatet treguan se me çdo nivel në rritje të ashpërsisë së simptomave të depresionit, pjesëmarrësit kishin temperatura më të larta të trupit.
Gjetjet hedhin dritë mbi mënyrën se si mund të funksionojë një metodë e re e trajtimit të depresionit, tha Dr. Ashley Mason, autore kryesore e studimit dhe profesoreshë e asociuar e psikiatrisë në Institutin UCSF Weill për neuroshkencat.
Një numër i vogël i studimeve ekzistuese ka zbuluar se përdorimi i vaskave të nxehta ose saunave mund të zvogëlojë depresionin, ndoshta duke e nxitur trupin të vetë-freskohet, për shembull përmes djersitjes.
“Ironikisht, ngrohja e njerëzve në fakt mund të çojë në uljen e temperaturës së trupit që zgjat më shumë sesa thjesht ftohja e njerëzve drejtpërdrejt, si përmes një banjë akulli”, tha Dr. Mason, e cila është gjithashtu një psikologe klinike.
“Duke pasur parasysh ritmet në rritje të depresionit në Shtetet e Bashkuara, ne jemi të ngazëllyer nga mundësitë e një rruge të re për trajtim”, tha Dr. Mason. /Gazeta Shneta/