Rritja e sulmeve kibernetike kundër organizatave të kujdesit shëndetësor lë miliona pacientë me të dhënat e tyre të ekspozuara dhe jetën e tyre të rrezikuar.
Burimi Healthnews pyeti dy ekspertë nëse kriminelët mund të hakojnë pajisjet mjekësore personale, të tilla si pompat e insulinës ose stimuluesit kardiak, përcjell Gazeta Shneta.
Në shtator 2022, Administrata Amerikane e Ushqimit dhe Barnave (FDA) paralajmëroi se pompa të caktuara të insulinës mund të lejojnë akses të paautorizuar në sistemin e pompës, gjë që mund të shkaktojë që pompa të japë më shumë ose më pak insulinë.
Eksperimentet zbuluan dobësi të ngjashme në pajisje të ndryshme mjekësore, duke filluar nga një monitor i zemrës së foshnjës me Wi-Fi e deri te një pompë insuline, por ka pak prova për shkelje në jetën reale.
Kur ish-zëvendëspresidenti Dick Cheney iu zëvendësua defibrilatori i tij ndërsa ishte ende në detyrë në vitin 2007, pajisja duhej të modifikohej në mënyrë që të mos mund të hakohej nga terroristët që mund të përpiqeshin ta vrisnin.
Megjithatë, nuk ka gjasa që kriminelët të hakojnë pompën e insulinës ose pajisje të tjera mjekësore të një amerikani mesatar, thotë Chad Holmes, pjesë e një kompanie të sigurisë kibernetike me bazë në Nju Jork.
“Nëse jeni një amerikan mesatar, ato pajisje do t’ju japin shumë më tepër kujdes sesa rrezik.”
Chad Holmes
Si të mbroni pajisjen tuaj mjekësore
Edhe pse gjasat për t’ju hakuar matësin e glukozës ose stimuluesin kardiak janë të ulëta, më mirë të jeni të sigurt.
Dr. Eugene Vasserman, një profesor i asociuar në Universitetin Shtetëror të Kansasit, rekomandon marrjen e masave të përgjithshme. Për shembull, nëse pajisja është lidhur me një smartfon mbrojeni atë me një fjalëkalim të fortë dhe shmangni instalimin e aplikacioneve që nuk ju besoni.
“Mos shkarkoni gjëra që mund të ndërveprojnë në mënyrë indirekte me komponentin e aplikacionit mjekësor që funksionon në telefonin tuaj…” tha Dr. Eugene Vasserman.
Përfundimisht, siguria e pajisjeve mjekësore varet nga prodhuesi, thotë Dr. Vasserman. Prandaj, përdoruesi duhet të ndjekë udhëzimet e prodhuesit për të siguruar që pajisja të jetë konfiguruar saktë.
Cilat janë shenjat që tregojnë se pajisja juaj është hakuar?
Një nga shenjat që pajisja juaj mjekësore është hakuar mund të jetë aktiviteti i pazakontë, si ngadalësimi ose shfaqja e gjërave të papritura, shpjegon Dr. Vasserman.
Ai thotë se çdo sjellje e pazakontë duhet t’i raportohet prodhuesit, i vetmi që është i kualifikuar për të përcaktuar shkakun e aktivitetit jonormal.
Shembuj të tjerë të aktivitetit të pazakontë janë pajisja që nuk reagon ose ka më shumë gabime sesa zakonisht, thotë Holmes.
Ai shton, “çdo sjellje jonormale mund të nënkuptojë se pajisja thjesht duhet të zëvendësohet, ose mund të jetë një shenjë se ajo është komprometuar”. /Gazeta Shneta/