Sekretari amerikan i shëndetësisë, Robert F. Kennedy Jr., ka deklaruar se dëshiron që terapitë me substanca psikodelike të miratohen brenda një viti — një njoftim që i befasoi edhe përkrahësit më të vendosur të këtyre trajtimeve.
Prej dekadash, përkrahësit e substancave si LSD dhe MDMA (ekstazi) kanë kërkuar që këto droga të përdoren për trajtimin e depresionit, traumës dhe sëmundjeve të tjera të vështira. Tani, për herë të parë, një administratë presidenciale në SHBA po jep sinjale se e mbështet këtë qasje, shkruan burimi Euronews Health transmeton Gazeta Shneta.
Kennedy tha se këto terapi kanë “përparësi të jashtëzakonshme në një ambient klinik” dhe se administrata po punon për miratimin e tyre brenda 12 muajsh.
Por ritmi i shpejtë i kësaj iniciative ka ngjallur shqetësime. Disa ekspertë frikësohen se lidhja me figura kontestuese si Kennedy, i njohur për qëndrimet kundër vaksinave dhe antidepresantëve, mund ta dëmtojë besueshmërinë e fushës.
Agjencia amerikane FDA, e cila më parë refuzoi MDMA si trajtim për PTSD për shkak të të dhënave të mangëta, tani duket më e hapur për rishqyrtim.
Drejtori i FDA-së, Marty Makary, e ka shpallur vlerësimin e këtyre substancave si përparësi. Ai ka propozuar procedura të përshpejtuara dhe më shumë fleksibilitet për studimet klinike.
SHBA po rekruton gjithashtu staf me përvojë në fushën e psikodelikëve, ndërsa Kennedy ka ndarë përvoja personale për efektet pozitive të tyre. Megjithatë, disa shkencëtarë paralajmërojnë se entuziazmi nuk duhet të tejkalojë provat shkencore.
“Duhet kujdes që të mos bjerë viktimë e entuziazmit të tepruar,” tha Dr. Nora Volkow nga Instituti Kombëtar i Abuzimit me Droga. /Gazeta Shneta/