Me afrimin e pranverës dhe rritjen e temperaturave, poleni nis të bëhet një nga shqetësimet kryesore për personat që vuajnë nga alergjia sezonale (hayfever). Kruajtja e syve, rrjedhja e hundës, teshtimat dhe vështirësitë në frymëmarrje janë ndër simptomat më të shpeshta që shfaqen gjatë kësaj periudhe.
Ekspertja Tina Patel ka ndarë disa këshilla praktike për të reduktuar ekspozimin ndaj polenit dhe për të lehtësuar simptomat gjatë pranverës.
Një nga rekomandimet kryesore është të mos hapen menjëherë dritaret sapo moti të ngrohet. Edhe pse ajri i freskët është joshës, hapja e dritareve mund të lejojë depërtimin e polenit në ambientet e brendshme, duke shkaktuar irritim dhe lotim të syve. Sipas saj, pasi poleni hyn në shtëpi, mund të jetë i vështirë për t’u larguar.
Për këtë arsye, këshillohet pastrimi i rregullt i shtëpisë me fshesë me korent dhe fshirja e sipërfaqeve me leckë të lagur, në mënyrë që të hiqen grimcat e polenit.
Një tjetër rekomandim lidhet me lulet e freskëta në shtëpi. Personat me alergji sezonale duhet të shmangin mbajtjen e tyre ose të zgjedhin me kujdes llojet që sjellin brenda. Disa lule konsiderohen më të përshtatshme për personat alergjikë, si trëndafilat, tulipanët, hortensiat, orkidetë dhe bozhuret.
Ekspertja thekson gjithashtu rëndësinë e kufizimit të ekspozimit ndaj polenit gjatë ditës. Ajo sugjeron aplikimin e një sasie të vogël vazeline rreth vrimave të hundës, e cila mund të ndihmojë në kapjen e grimcave të polenit përpara se të hyjnë në rrugët e frymëmarrjes.
Po ashtu, rekomandohet që pas kthimit nga jashtë të bëhet dush dhe të ndërrohen rrobat, për të larguar polenin e mbledhur në trup dhe veshje.
Zbatimi i këtyre masave të thjeshta mund të ndihmojë në menaxhimin më të mirë të alergjive sezonale dhe ta bëjë periudhën e pranverës më të përballueshme për personat e prekur.