Kohët e fundit, medikamentet GLP-1, si Ozempic dhe Mounjaro, kanë revolucionarizuar trajtimin e diabetit të tipit 2 dhe menaxhimin e peshës trupore. Suksesi i tyre ka nxjerrë në pah rolin kyç të hormoneve të zorrëve në kontrollin e oreksit, metabolizmit dhe niveleve të sheqerit në gjak.
Këto barna veprojnë mbi hormonin GLP-1, i cili transmeton sinjale nga zorra drejt trurit për të ulur ndjenjën e urisë, për të rritur ngopjen dhe për të përmirësuar rregullimin e glukozës në gjak.
Pikërisht ky mekanizëm ka nxitur interesin e studiuesve për të gjetur alternativa natyrale që mund të ndikojnë në të njëjtën mënyrë, shkruan Medical News Today transmeton Gazeta Shneta.
Një rishikim shkencor i publikuar nga studiues të Universitetit Heliopolis në Kajro ka analizuar ndikimin e disa përbërësve ushqimorë natyralë në aktivitetin e hormonit GLP-1.
Edhe pse deri më tani nuk është identifikuar asnjë substancë natyrore që të imitojë plotësisht efektet e injeksioneve GLP-1, disa përbërës tregojnë potencial premtues.
Kafeina, proteinat dhe ekstrakti i çajit jeshil mund të kontribuojnë në rritjen e metabolizmit dhe përmirësimin e sinjaleve të ngopjes.
Gjithashtu, substanca si berberina, kanella dhe çaji jeshil janë duke u studiuar për rolin e tyre në rritjen e ndjeshmërisë ndaj insulinës dhe kontrollin e oreksit.
Megjithëse kërkimet janë ende në fazat fillestare, provat aktuale sugjerojnë se përzgjedhja e ushqimeve të duhura dhe koha e të ngrënit mund të ndihmojnë në rregullimin natyror të aktivitetit të GLP-1.
Kjo qasje mund të kontribuojë në një “riprogramim” të sinjaleve të urisë dhe ngopjes, duke ofruar alternativa më natyrale, më të përballueshme dhe më të qasshme për kontrollin e peshës trupore. /Gazeta Shneta/