Një test i ri gjaku, i quajtur Galleri, mund të identifikojë më shumë se 50 lloje kanceri dhe të përshpejtojë diagnostikimin, sipas një prove klinike në Amerikën e Veriut.
Testi i zhvilluar nga kompania amerikane Grail, zbulon fragmente të ADN-së kancerogjene që qarkullojnë në gjak pasi shkëputen nga tumori, shkruan Returs, transmeton Gazeta Shneta.
Në provë morën pjesë 25 mijë të rritur nga SHBA dhe Kanada për një vit, ku rreth një në 100 mori rezultat pozitiv dhe në 62% të këtyre rasteve kanceri u konfirmua më pas.
Më shumë se gjysma e rasteve u zbuluan në faza të hershme, kur trajtimi është më efektiv dhe shanset për shërim më të larta. Kur testi u kombinua me kontrollet ekzistuese për gjirin, zorrën e trashë dhe qafën e mitrës, numri i kancereve të zbuluara u shtatëfishua, ndërsa tre të katërtat e kancereve të identifikuara ishin lloje pa programe ekzistuese kontrolli, si vezoret, mëlçia, stomaku, fshikëza dhe pankreasi.
Testi gjithashtu përcaktoi saktësisht origjinën e kancerit në nëntë nga 10 raste dhe përjashtoi praninë e kancerit në mbi 99% të rasteve negative. Megjithatë, studiues të tjerë paralajmërojnë se nevojiten më shumë prova për të treguar ndikimin real në uljen e vdekjeve nga kanceri.
Rezultatet e plota do të prezantohen në Kongresin e Shoqatës Evropiane për Onkologji Mjekësore në Berlin, ndërsa një provë trevjeçare me 140 mijë pacientë të NHS në Angli pritet të japë rezultate vitin e ardhshëm.
Nëse ato janë pozitive, NHS planifikon të zgjerojë përdorimin e testit për një milion persona. Ekspertët e paralajmërojnë gjithashtu për rrezikun e mbidiagnostikimit, ku kancere që ndoshta nuk do të shkaktonin dëm mund të zbulohen dhe trajtohen pa nevojë./Gazeta Shneta/