Shoqata e Anesteziologëve të Kosovës e cila udhëhiqet nga Dr. Lulzim Emini, ka shprehur ngushëllime për vdekjen e kolegut të tyre nga Shqipëria Prof. Dr. Ilir Ohri.
Emini në telegramin e ngushëllimit e ka vlerësuar lart kontributin e Ohrit në ngritjen e nivelit të anesteziologjisë në Shqipëri, por edhe për kontributin e tij në Kosovë, transmeton Gazeta Shneta.
“Vlerat prej një intelektuali të urtë dhe profesionisti të devotshëm arriti ti bartë edhe te brezi i ri i Anesteziologëve në Kosovë, me ç’rast në vitin 2000 në Prishtinë, për herë të parë mundësoi organizimin e provimit specialistik nga lëmia e Anesteziologjisë me Mjekim Intensiv.
Nga kjo kohë e deri më sot, kanë dalë disa gjenerata të Anesteziologëve dhe Intensivistëve në Kosovë, që ka mundëssuar ngritjen e nivelit të sistemit shëndetësor në tërësi, falë idesë dhe përkushtimit të Profesor Ilirit”, thuhet në telegramin e ngushëllimit.
Letra e plotë:
E nderuar Familje e Prof. Dr Ilir Ohrit,
I nderuar Kryetar dhe të nderuar anëtarë të Shoqatës së Anestezistëve dhe Reanimatorëve të Shqipërisë,
I nderuar komunitet i profesionistëve shëndetësorë në Shqipëri dhe Kosovë,
Në profesionin e shenjtë të Anesteziologut, ka momente të vështira, por njëri prej më të vështirëve është të përjetosh ditën kur një koleg i yti nuk jeton më!
Sot, me dhimbje të thellë morëm lajmin e rëndë, humbjen e Prof. Dr Ilir Ohri, ngjarje që na tronditi të gjithëve.
Profesori jetoi dhe punoi në kushte të vështira në kohëra turbulente, por niveli etiko-moral dhe profesional i tij kishte një konstantë ngirtjeje deri në momentin e fundit të jetës.
Kontributi i tij në themelimin, zhvillimin dhe ngritjen në nivel më të lartë të lëmisë së Anesteziologjisë në Shqipëri është i pamohueshëm dhe shembull për brezat e tij dhe ata pasues.
Vlerat prej një intelektuali të urtë dhe profesionisti të devotshëm arriti ti bartë edhe te brezi i ri i Anesteziologëve në Kosovë, me ç’rast në vitin 2000 në Prishtinë, për herë të parë mundësoi organizimin e provimit specialistik nga lëmia e Anesteziologjisë me Mjekim Intensiv.
Nga kjo kohë e deri më sot, kanë dalë disa gjenerata të Anesteziologëve dhe Intensivistëve në Kosovë, që ka mundëssuar ngritjen e nivelit të sistemit shëndetësor në tërësi, falë idesë dhe përkushtimit të Profesor Ilirit.
Thjeshtësia e tij e veprimit dhe respekti ndaj kolegëve, pavarësisht moshës së tyre, na bën të kemi ndjesi të përjetshme respekti.
Në emër të Shoqatës së Anesteziologëve dhe Intensivistëve të Kosovës-ShAIK, pranoni ngushëllime të sinqerta për humbjen e Prof, Dr Ilir Ohrit, që është një humbje e ndjeshme për Ju, për Mjekësinë në përgjithësi dhe për Anesteziologjinë në të gjitha trojet shqiptare, në veçanti.
Ne, kolegët e tij, do të vazhdojmë punën, aty ku e la Profesor Iliri, për të mirën e pacientëve të cilët i trajtoi me shumë përkushtim dhe krijimin e brezave të rinj të profesionistëve, që e kishte pasion të veçantë.
Kujtimi për jetën dhe veprimtarinë e Prof. Dr Ilir Ohri, do të jetë i përjetshëm!
Prishtinë Me respekt,
22.12.2022 Dr Lulzim EMINI
Kryetar i ShAIK