Anëtarët e Komisionit Parlamentar për Shëndetësi dhe Mirëqenie Sociale kanë vizituar dje Qendrën e Resurseve për Aftësi të Kufizuar, HANDIKOS.
Gjatë kësaj vizite anëtarët e komisionit, u njoftuan, në mes të tjerash, edhe për sfidat që personat me aftësi të kufizuar dhe prindërit përballen, sikurse qasja fizike, edukimi, mungesën e kujdestarëve.
“Çështjet që u diskutuan janë ato që lidhen drejtpërdrejt me jetën e personave me aftësi të kufizuara, duke filluar nga përmirësimi i kuadrit ligjor, fokusi në ofrimin e shërbimeve shëndetësore dhe rehabilituese institucionale, ku këto shërbime nuk ofrohen në vendin tonë nga institucionet deri më tani. Ndërsa momentalisht, në vendin tonë çdo shërbim i marrë, bëhet me pagesë. Gjithashtu u nënvizua se mos-ofrimi i këtyre shërbimeve e përkeqëson dhe rrezikon edhe më tepër shëndetin dhe mirëqenien e personave me aftësi të kufizuara”, thuhet në njoftimin e “HANDIKOS”.
Të pranishëm në këtë vizitë, ishte kryesuesja e komisionit, Fatmire Kollçaku, si dhe anëtari, njëherish deputeti, Burim Meta.
Qeveria e Kosovës, vitin 2022 e ka shpallur vit për personat me aftësi të kufizuar./Gazeta Shneta/
