Ish-ministri Arben Vitia përfundimisht bëhet pjesë e kompanisë ‘Olive’

2022-05-13 në ora 17:53

Ish-ministri Arben Vitia është përfundimisht pjesë e kompanisë ‘Olive’ e cila zotëron disa laboratorë dhe së fundmi edhe një spital në Prishtinë.

Vitia raportohet se është punësuar në këtë kompani në cilësinë e drejtorit, shkruan Gazeta Shneta.

Se ish-ministri i Shëndetësisë tashmë është bërë pjesë e këtij institucioni shëndetësor privat, e konfirmon edhe një fotografi e publikuar në rrjetet sociale nga bashkëshortja e pronarit të kompanisë.

Pronar i kompanisë ‘Olive Medical Group’ është Fatmir Sejdiu me 80 për qind të aksioneve, ndërsa Blerim Bajqinca me 20 për qind.

Kjo kompani së fundmi ka blerë edhe spitalin “Sirona”, gjë për të cilën Gazeta ka raportuar edhe javë më parë. Bëhet fjalë për një shit-blerje milionëshe dhe pritet të shndërrohet në një spital të përgjithshëm.

Kujtojmë se Arben Vitia ka qenë ministër i Shëndetësisë me nga disa muaj dy herë radhazi në Qeverinë Kurti dhe Kurti 2. Në fund të shtatorit të vitit të kaluar ai dha dorëheqje nga kjo pozitë pasi kandidoi për kryetar të komunës së Prishtinës ku doli i dyti. /Gazeta Shneta/