Anglia është në rrugën e duhur për të qenë një nga vendet e para në botë që do të zhdukë hepatitin C, falë një marrëveshje miliardë funta për barna dhe programet ndërgjegjësuese.
Vendi mund të eliminojë virusin deri në vitin 2025 – vite përpara objektivit të përgjithshëm të Organizatës Botërore të Shëndetësisë (OBSH) për vitin 2030, ka njoftuar të mërkurën, Shërbimi Shëndetësor Kombëtar i Mbretërisë së Bashkuar (NHS).
Hepatiti C infekton mëlçinë dhe mund të shkaktojë dëme potencialisht kërcënuese për jetën nëse nuk trajtohet, shkruan Euronews transmeton Gazeta Shneta.
Përhapet përmes kontaktit gjak me gjak, më së shpeshti përmes gjilpërave të përbashkëta.
Ndërsa është i trajtueshëm në shumicën e rasteve, zbulimi nuk është gjithmonë i lehtë, pasi nuk paraqet simptoma derisa mëlçia të jetë dëmtuar.
Për shkak të kësaj, është e rëndësishme të gjurmohen njerëzit që mund të jenë në rrezik të kontraktimit të virusit, pasi ata nuk do të shfaqin simptoma menjëherë.
Virusi është i trajtueshëm, me ilaçe efektive antivirale që shërojnë më shumë se 95 për qind të pacientëve, me efekte anësore minimale.
NHS vlerësoi se kishte rreth 118,000 njerëz në Mbretërinë e Bashkuar me hepatit C kronik në vitin 2019.
Qendra Evropiane për Parandalimin dhe Kontrollin e Sëmundjeve (ECDC), vlerëson se 3.9 milionë njerëz jetonin me hepatit C në BE, MB, Islandë, Lihtenshtajn dhe Norvegji në vitin 2015.
Një raport i ECDC për hepatitin e vitit 2022, ka njoftuar se kishte boshllëqe në të dhënat e disponueshme për hepatitin në të gjithë Evropën dhe u bëri thirrje vendeve që t’i jepnin përparësi mbledhjes së të dhënave më të plota të monitorimit.
Të dhënat e disponueshme tregojnë se progresi në të gjithë rajonin e BE-së është i ndryshueshëm, me shumë vende “larg nga arritja” e objektivit të OBSH-së. /Gazeta Shneta/