Është anuluar konkursi për drejtor të Klinikës së Kardiokirurgjisë dhe Kardiologjisë Invazive në QKUK.
Gazeta ka mësuar se anulimi i këtij konkursi ka të bëj me ndryshimet statutore që pritet të ndodhin së shpejti.
Kardiologjia Invazive pritet të rikthehet në kuadër të Klinikës së Kardiologjisë sikurse ka qenë para vitit 2018. Kjo pritet të ndodh me vendim të u.d. ministres së Shëndetësisë Dafina Gexha-Bunjaku.
Edhe në arsyetimin e anulimit të konkursit është konfirmuar se riorganizimi i Klinikës së Kardiokirurgjisë është në proces e sipër.
“Statuti i QKUK-së është në plotësim-ndryshim dhe diskutim riorganizimi i Klinikës së Kardiokirurgjisë dhe Kardiologjisë Invazive, kërkon që konform legjislacionit në fuqi të anulohet pozita e tretë sipas Konkursit të Brendshëm nr. 6852 e datës 20.10.2021 për drejtor të Kardiokirurgjisë me Kardiologji Invazive, deri në një vendim tjetër”, thuhet në arsyetim.
Kujtojmë se ka dy qëndrime sa i përket riorganizimit të këtyre dy klinikave. Kardiologët edhe më parë kanë kërkuar që Invaziva të ribashkohet me ta për shkak të përcjelljes së pacientëve pas ndërhyrjes.
Ndërkaq kardiologët invaziv kanë nënshkruar edhe një peticion kundër vendimit për rikthim në Kardiologji, duke kërkuar që ky shërbim të mbetet në Kardiokirurgji ose të themelohet si njësi në vete. /Gazeta Shneta/