Kardiokirurgu shqiptar Edvin Prifti u arrestua në Tiranë pasi u kap duke marr ryshfet për operimin e një paciente.
Struktura e Posaçme Anti Korrupsion, SPAK ka sekuestruar 250 mijë euro dhe 160 milionë lekë në banesën e Edvin Priftit, kirurgut të zemrës në QSUT, emri i të cilit përmendet në përgjimet që çuan në arrestimin e gjyqtares së Krujës, Enkeleda Hoxha.
Ndërkohë, nga kontrolli në banesën e gjyqtares Enkeleda Hoxha SPAK ka sekuestruar 10 mijë dollarë.
Edvin Prifti doli në përgjime në kuadër të operacionit për arrestimin e gjyqtares Hoxha. Prifti kishte komunikuar me sekretaren e Gjykatës Krujë, ku kjo e fundit i kërkonte favor për të asistuar në operacionin e nënës së saj.
Gjyqtarja e Krujës, Enkeleda Hoxha, pasi i ktheu lirinë disa prej eksponentëve kryesorë të krimit në Shqipëri, përfundoi vetë në pranga. Struktura e Posaçme Anti-Korrupsion (SPAK) urdhëroi arrestimin e saj në sallën e gjyqit dhe të një grupi prej 9 personash, të përfshirë në këtë skemë korruptive dhe kriminale.
Gjyqtarja, e cila me vendimet e saj ka liruar nga qelia edhe eksponentë të krimit si Genc Tafili dhe Hekuran Billa mësohet se po shqyrtonte kërkesën e të dënuarit për vrasje Saimir Petani, i cili sipas hetimeve do të përfitonte lehtësi nga vendimi që do të jepej.
Eksperti psikiatriko-ligjor Shkëlqim Korbi akuzohet për “ekspertim të rremë”, ndërsa përgjimet mjedisore dhe telefonike kanë zbuluar edhe një rast korrupsioni në sistemin e shëndetësisë.
Sekretarja e gjykatës së Krujës Manuela Mallkuçi i ka dhënë para mjekut kardiokirurg në QSUT Edvin Prifti, me qëllim që ky i fundit të bënte operacion të ëmën e saj. Një çështje kjo që nuk lidhet me skandalin e gjyqtares, por që përgjimet kanë kapur gjatë bisedave me persona të tretë.