Deputeti Haxhi Avdyli pas takimit me përfaqësuesit e specializantëve ka bërë një postim në Facebook ku ka thumbuar ministrin e ri të Shëndetësisë Rifat Latifi.
Avdyli ka thënë se gabimet e së kaluarës me specializantët duhet të riparohen sa më shpejt, për të ndalur ikjen e mjekëve të rinj nga Kosova, shkruan Gazeta Shneta.
Avdyli ka thënë se para se të mendojmë për rikthimin e trurit nga jashtë, duhet të punojmë për të mbajtur trurin që kemi këtu. Ndryshe kishte deklaruar ministri i ri i Shëndetësisë Rifat Latifi. Në konferencën për media në ditën e emërimit, Latifi kishte thënë se do të punojë për rikthimin e trurit në shëndetësinë e Kosovës.
“Para se të mendojmë në rikthimin e trurit, të punojmë fort ta ndalim trurin që kemi. Ta kujdesemi e ta riparojmë trurin mjekësor të së ardhmes”, ka deklaruar Avdyli.
Deputeti i ka përkrahur kërkesat e specializantëve me vetfinancim, për të siguruar buxhet për pagat e tyre.
Lexoni postimin e plotë të Avdylit:
Derisa përfaqësuesit i specializantëve tregonin peripecitë e tyre, më rikthenin në kohën 1999-2005 kur edhe vetë isha në pozitë të tyre. Por tani nga viti i kaluar kur qeveria e kaluar ndau mijëra specializime pa planifikuar mirë ardhmërinë e tyre, statusi tyre është më i rënduar, sepse shumica tyre me vetëfinancim. Tani të mbetur pa kushte minimale me mbajt veten e familjen me një pagë solide ,nuk lë hapësirë për ta, për të marrë edukim specialistik në nivelin e regjionit së paku.
Subvencionet dhëna e pa status të qartë financiar , kujdestari pa pagesë ( veq 2 me pagesë) , pa programe të mirëfillta edukuese, me pengesa tjera administrative , janë tepër dekurajuese për ta për të parë perspektivën e vazhdimit të punës, jetës por edhe shërbimin e tyre të mirë karshi pacientëve. Shumë nga ta tani edhe me viza gjermane ne xhep, kërkonin nga ne sot përkrahje për mbijetesë.
Shëndetësia ka 3 asete kryesore: objektet e hapësirat, aparaturat e furnizimet dhe resurset humane. Asnjë ska vlerë e sfunksionon kur asetet tona njerëzore në shëndetësi kanë kaq shumë probleme e luftë për mbijetesë. Me buxhetin e rritur duhet urgjent të planifikohet zgjidhja e statusit tyre legal e financiar sepse asesi nuk janë barrë financiare se edhe ashtu po bëhet pagesa me subvencione . Por edhe po të ishin, janë aseti kryesor i punës së tashme në Klinika por edhe ardhmëria e kuadrit tonë mjekësor. Prandaj ia vlen të investohet në ta.
Gabimet e kaluarës në planifikim të resurseve njerëzore duhet riparuar sa më shpejtë në mënyrë që të ndalet trendi i ikjes të mbi 100 mjekëve të rinj në vit nga Kosova. Prandaj para se të mendojmë në rikthimin e trurit, të punojmë fort ta ndalim trurin që kemi. Ta kujdesemi e ta riparojmë trurin mjekësor të së ardhmes. Sepse është e vërtetuar shkencërisht që truri nuk mund të funksionoj në sisteme pa oksigjen. Prandaj Oksigjeni financiar minimal është i nevojshëm për ta mbajtur gjallë sistemin tonë shëndetësor tani dhe 20 vitet e ardhshme. Unë si specialist i Neurokirurgjisë e deputet, sot ndjehem dhe do jetoj në lëkurën e specializantëve deri sa të zgjidhen problemet bazike për ta.