Një analizë e re shkencore sugjeron se barnat moderne për trajtimin e obezitetit nuk ndihmojnë vetëm në humbjen e peshës, por mund të kenë edhe përfitime të rëndësishme për shëndetin e zemrës, duke ulur tensionin e lartë të gjakut.
Studimi i ri përfshiu të dhënat e mbi 43 mijë të rriturve me mbipeshë ose obezitet nga 32 prova klinike ndërkombëtare.
Rezultatet treguan se personat që përdorën barna kundër obezitetit humbën mesatarisht 10.9% të peshës trupore dhe regjistruan një ulje mesatare prej 5.2 mmHg të tensionit sistolik, krahasuar me ata që morën placebo.
Sipas studiuesve, për çdo 1% humbje peshe, tensioni sistolik ulej mesatarisht me 0.34 mmHg. Analiza sugjeron se rreth 77% e përmirësimit të tensionit të gjakut lidhej drejtpërdrejt me humbjen e peshës, shkruan burimi Medical News Today transmeton Gazeta Shneta.
Ekspertët theksojnë se obeziteti dhe hipertensioni shpesh shfaqen së bashku dhe rrisin ndjeshëm rrezikun për sëmundje të zemrës, goditje në tru, dëmtime të veshkave dhe vdekje të parakohshme.
Për këtë arsye, kontrolli i peshës konsiderohet një nga strategjitë më efektive për menaxhimin e tensionit të lartë.
Përveç ndikimit të humbjes së peshës, studiuesit besojnë se disa barna të grupit GLP-1 mund të ndihmojnë në uljen e tensionit edhe përmes mekanizmave të tjerë biologjikë, si përmirësimi i funksionit të enëve të gjakut, rritja e eliminimit të natriumit nga organizmi dhe reduktimi i ngurtësisë së arterieve.
Megjithëse nevojiten studime të mëtejshme, gjetjet tregojnë se trajtimi i obezitetit mund të luajë një rol gjithnjë e më të rëndësishëm në parandalimin e sëmundjeve kardiovaskulare. /Gazeta Shneta/