Sëmundjet kardiovaskulare mbeten shkaku kryesor i vdekjeve tek gratë në mbarë botën, duke përbërë rreth 30% të të gjitha vdekjeve. Një studim i ri sugjeron se periudha e perimenopauzës mund të jetë momenti më i rëndësishëm për të ndërmarrë hapa që ndihmojnë në mbrojtjen e shëndetit të zemrës.
Studimi i publikuar në “Journal of the American Heart Association”, analizoi të dhënat shëndetësore të më shumë se 9,200 grave të moshës 18 deri në 80 vjeçe. Pjesëmarrëset u ndanë në tre grupe: para menopauzës, gjatë perimenopauzës dhe pas menopauzës.
Rezultatet treguan se gratë në perimenopauzë kishin dy herë më shumë gjasa të shfaqnin tregues të dobët të shëndetit kardiovaskular krahasuar me gratë para menopauzës, shkruan burimi Medical News Today transmeton Gazeta Shneta.
Problemi më i theksuar lidhej me ushqyerjen jo të shëndetshme, një nga faktorët kryesorë që ndikon në rrezikun e sëmundjeve të zemrës.
Sipas studiuesve, kjo periudhë shpesh shoqërohet me ndryshime hormonale, shtim në peshë, lodhje, pagjumësi dhe ulje të energjisë.
Megjithatë, rreziku kardiovaskular shpesh nuk diskutohet sa duhet në këtë fazë të jetës së gruas.
Ekspertët theksojnë se perimenopauza nuk duhet parë si një periudhë pritjeje deri në menopauzë, por si një dritare e rëndësishme për ndërhyrje parandaluese.
Përmirësimi i dietës, aktiviteti fizik i rregullt, mbajtja e një peshe të shëndetshme dhe shmangia e duhanit mund të zvogëlojnë ndjeshëm rrezikun e sëmundjeve të zemrës në të ardhmen. /Gazeta Shneta/