Bashkimi Evropian do të nisë një vlerësim të ndikimit që mund të ketë politika e re e administratës së presidentit amerikan Donald Trump për çmimet e barnave, mes shqetësimeve se ajo mund të çojë në rritje çmimesh dhe vonesa në furnizimin me ilaçe inovative në tregun evropian.
Ministrat e Shëndetësisë të vendeve anëtare i kanë kërkuar Komisionit Evropian të analizojë pasojat e politikës së njohur si “Most Favoured Nation” (MFN), e cila synon që kompanitë farmaceutike të ofrojnë barna në SHBA me çmime të ngjashme me ato të vendeve të tjera të zhvilluara.
Urdhri ekzekutiv i nënshkruar nga Trump në maj synon të ulë kostot e barnave për pacientët amerikanë, por ekspertët paralajmërojnë se kompanitë farmaceutike mund të përpiqen të kompensojnë humbjet duke kërkuar çmime më të larta në tregje të tjera ose duke shtyrë hedhjen në treg të produkteve të reja.
Sipas një analize të kompanisë kërkimore GlobalData, të cituar nga Reuters, numri i lançimeve të barnave në tregjet e Bashkimit Evropian ka rënë me rreth 35 për qind në dhjetë muajt pas miratimit të politikës amerikane, krahasuar me periudhën paraprake.
Komisioneri Evropian për Shëndetësinë, Olivér Várhelyi, tha se Komisioni do të shqyrtojë se cilat produkte farmaceutike mund të preken nga politika amerikane, nëse do të ketë ndikim në lançimin e barnave të reja dhe nëse disa kompani mund të tërhiqen nga tregu evropian.
“Duam të kuptojmë se si funksionon kjo politikë dhe çfarë ndikimi të përgjithshëm mund të ketë në tregun e Bashkimit Evropian”, deklaroi Várhelyi pas takimit të ministrave të Shëndetësisë në Luksemburg.
Ai shtoi se vlerësimi do të realizohet me urgjencë dhe synimi është që rezultatet paraprake të jenë gati para përfundimit të verës.
Shqetësimi kryesor i vendeve anëtare mbetet qasja e qytetarëve evropianë në barna të reja dhe inovative, nëse kompanitë farmaceutike vendosin të favorizojnë tregun amerikan për shkak të madhësisë dhe përfitimeve ekonomike që ofron.