Bordi për Shkollim Specialistik ka filluar sot intervistimin për grupin e kandidatëve në lëminë e kirurgjisë së fëmijëve.
Komisioni i përbërë nga anëtarët e Bordit, kryesuesi Labinot Shahini, Bedri Braha dhe Florije Rexhepi, janë takuar edhe me ministrin e Shëndetësisë Armend Zemaj, i cili ka përshëndetur fillimin e këtij procesi, shkruan Gazeta Shneta.
Zemaj ka thënë se do të insistojë në një transparencë të plotë të këtij procesi për të siguruar paanësi për kandidatët. “Ky angazhim ka të bëj me atë që ne jemi zotuar që të ketë specializime dhe punësime”, ka deklaruar ministri.
Ai ka thënë se së shpejti do të mbahen intervistat edhe për shqiptarët nga Lugina e Preshevës dhe Malit të Zi.
Zemaj ka thënë se në këtë proces janë adresuar shqetësimet e odave të profesionistëve shëndetësorë. Sipas tij përfaqësuesit e odave janë pjesë e mbikëqyrjes dhe përbërjes së komiteteve specialistike.
“Mendoj se është interes nacional i shëndetësisë kosovare duke pas parasyshë se i kemi dhënë kahje në të mirë ngritjes së kuadrove të reja pa pasur nevojë të kërkojnë zgjidhje jashtë vendit. Është një numër i madh i kandidatëve dhe me ndryshimet në ligjin për shëndetësi, jemi duke shikuar mundësinë që nga viti i ardhshëm do të ketë specializime të rregullta por po shikojmë mundësitë që çdo kush që dëshiron të marr specializim me vetfinancim ta ketë mundësinë ta bëj në çdo kohë”, ka deklaruar Zemaj. /Gazeta Shneta/