Autoritetet shëndetësore në Britani kanë nisur një program urgjent vaksinimi kundër meningjitit B (MenB), pas shpërthimit më të madh të kësaj sëmundjeje në vitet e fundit, i cili ka ngritur shqetësime për rrezikun e përhapjes së infeksionit te të rinjtë.
Programi synon të vaksinojë falas nxënësit e moshës 17–18 vjeç dhe të rinjtë nën 25 vjeç që do të nisin studimet në universitete ose kolegje gjatë vjeshtës. Fushata do të zhvillohet gjatë muajve të verës, në mënyrë që studentët të jenë të mbrojtur para fillimit të vitit akademik, kur jetesa në konvikte dhe kontaktet e afërta rrisin ndjeshëm rrezikun e transmetimit të bakterit, shkruan Reuters, transmeton Gazeta Shneta.
Vendimi u mor pasi një shpërthim i rëndësishëm në qarkun Kent shkaktoi disa viktima, ndërsa autoritetet shëndetësore identifikuan edhe grupe të tjera rastesh në zona të ndryshme të Anglisë. Sipas ekspertëve, këto zhvillime tregojnë nevojën për rritjen e mbrojtjes së grupeve më të rrezikuara.
Meningjiti B është një infeksion serioz bakterial që mund të shkaktojë inflamacion të cipave që mbështjellin trurin dhe palcën kurrizore, si dhe infeksion të rëndë të gjakut (sepsë). Sëmundja mund të përparojë brenda pak orësh dhe, nëse nuk trajtohet menjëherë, mund të ketë pasoja fatale ose të shkaktojë dëmtime të përhershme neurologjike.
Specialistët u bëjnë thirrje të rinjve dhe familjeve të tyre që të përfitojnë nga vaksinimi, duke theksuar se vaksina kundër meningjitit B është mënyra më efektive për të parandaluar sëmundjen dhe komplikimet e saj. /Gazeta Shneta/