Shpërthimi i virusit Ebola në Republikën Demokratike të Kongos po vazhdon të përkeqësohet, ndërsa autoritetet shëndetësore raportojnë rritje të vazhdueshme të numrit të të infektuarve dhe viktimave.
Sipas të dhënave më të fundit, në vend janë konfirmuar 1,155 raste me Ebola dhe 304 persona kanë humbur jetën si pasojë e sëmundjes, shkruan Reuters, transmeton Gazeta Shneta.
Vetëm gjatë 24 orëve të fundit janë regjistruar 37 raste të reja dhe pesë viktima, duke treguar se transmetimi i virusit në komunitet mbetet aktiv. Ekspertët vlerësojnë se, edhe pse kapacitetet për testim dhe mbikëqyrje epidemiologjike janë përmirësuar, numri i rasteve të reja vazhdon të rritet nga java në javë.
Sipas Organizatës Botërore të Shëndetësisë (OBSH), ky është shpërthimi më i madh i regjistruar ndonjëherë i shkaktuar nga varianti Bundibugyo i virusit Ebola. Situata është rënduar edhe nga konfliktet e armatosura në lindje të vendit, të cilat po vështirësojnë gjurmimin e kontakteve të personave të infektuar dhe qasjen e ekipeve mjekësore në zonat më të prekura.
Autoritetet shëndetësore kanë intensifikuar masat për kontrollin e epidemisë, përfshirë izolimin e rasteve, gjurmimin e kontakteve dhe forcimin e mbikëqyrjes epidemiologjike. Ndërkohë, organizatat ndërkombëtare po kërkojnë më shumë fonde dhe mbështetje logjistike për të frenuar përhapjen e virusit dhe për të parandaluar zgjerimin e shpërthimit në vendet fqinje.
Ebola është një sëmundje virale shumë e rrezikshme, me shkallë të lartë vdekshmërie nëse nuk diagnostikohet dhe trajtohet në kohë. Simptomat fillestare përfshijnë temperaturë të lartë, lodhje, dhimbje muskujsh dhe koke, ndërsa në fazat e avancuara mund të shfaqen gjakderdhje dhe dështim i organeve. /Gazeta Shneta/