Ekspertët e shëndetit publik në Britani kanë ngritur alarmin për rritjen e shpejtë të obezitetit te të rinjtë, duke e cilësuar atë si një nga sfidat më serioze për shëndetin publik në vitet e ardhshme.
Sipas specialistëve, shtimi i konsumit të ushqimeve ultra të përpunuara, ulja e aktivitetit fizik, si dhe vështirësitë ekonomike që kufizojnë qasjen në ushqime të shëndetshme, janë ndër faktorët kryesorë që po ndikojnë në rritjen e numrit të të rinjve me mbipeshë dhe obezitet, shkruan BBC, transmeton Gazeta Shneta.
Ekspertët paralajmërojnë se, nëse kjo prirje vazhdon, vendi mund të përballet me një rritje të ndjeshme të sëmundjeve kronike në dekadat e ardhshme. Obeziteti rrit rrezikun për zhvillimin e diabetit të tipit 2, sëmundjeve kardiovaskulare, tensionit të lartë të gjakut, disa llojeve të kancerit, si dhe problemeve me shëndetin mendor.
Specialistët bëjnë thirrje për masa më të forta parandaluese, duke përfshirë promovimin e ushqyerjes së shëndetshme, rritjen e aktivitetit fizik në shkolla dhe komunitet, si dhe politika që kufizojnë marketingun e ushqimeve të pashëndetshme për fëmijët dhe të rinjtë.
Ata theksojnë se ndërhyrja e hershme është thelbësore për të parandaluar pasojat afatgjata të obezitetit dhe për të ulur barrën e sëmundjeve kronike në sistemin shëndetësor. /Gazeta Shneta/