Një studim i ri laboratorik sugjeron se kombinimi i një antioksidanti të çajit të gjelbër me vitaminën B3 mund të ndihmojë në rinovimin e qelizave të trurit dhe në reduktimin e proceseve që lidhen me sëmundjen e Alzheimerit.
Studiuesit zbuluan se një antioksidant që gjendet në çajin e gjelbër, i kombinuar me nikotinamidin, një formë e vitaminës B3, ndihmoi në rikthimin e niveleve të energjisë në qelizat e trurit të minjve laboratorikë. Këto nivele energjie bien natyrshëm me moshën dhe janë të lidhura me zhvillimin e Alzheimerit, shkruan burimi Medical News Today transmeton Gazeta Shneta.
Pas vetëm 24 orësh trajtim, qelizat e trurit shfaqën nivele energjie të ngjashme me ato të qelizave më të reja. Kjo u shoqërua edhe me uljen e stresit oksidativ dhe reduktimin e grumbullimeve të proteinave amiloide, të cilat konsiderohen një nga shenjat kryesore të Alzheimerit.
Megjithatë, ekspertët paralajmërojnë se rezultatet janë arritur vetëm te kafshët dhe nuk do të thotë se suplementet e çajit të gjelbër ose vitaminës B3 do të kenë të njëjtin efekt te njerëzit. Sipas studiuesve, vitamina B3 e marrë nga goja shpërbëhet kryesisht në sistemin tretës para se të arrijë në tru.
Edhe pse suplementet nuk rekomandohen për momentin si trajtim, disa studime kanë treguar se konsumimi i rregullt i çajit të gjelbër lidhet me kujtesë më të mirë dhe rrezik më të ulët të dëmtimeve të trurit që shoqërohen me rënie njohëse.
Specialistët theksojnë se mënyra më e mirë për të mbështetur shëndetin e trurit mbetet një ushqyerje e ekuilibruar. Dieta MIND, e pasur me perime me gjethe jeshile, manaferra, drithëra të plota, arra, fara, peshk dhe vaj ulliri, konsiderohet një nga strategjitë më premtuese për uljen e rrezikut të Alzheimerit. /Gazeta Shneta/