Ndërsa Delta është ende duke dominuar, një variant i ri i COVID ka shkaktuar panik në të gjithë globin. Omicron është zbuluar në të paktën 38 vende, sipas Organizatës Botërore të Shëndetësisë (OBSH), e cila e etiketoi atë një “variant shqetësimi” në më pak se një javë.
Kjo do të thotë që varianti i ri mund të jetë më i transmetueshëm se variantet e mëparshme dhe të shmangë vaksinat ekzistuese, por ekspertët e virologjisë kanë paralajmëruar se atyre u duhen ende disa javë për të përcaktuar saktësisht se çfarë drejtimi do të marrë varianti Omicron, shkruan Best Life përcjell Gazeta Shneta.
Pavarësisht kësaj, rastet në rritje i kanë lejuar zyrtarët të marrin më shumë informacione për njerëzit e vaksinuar që mund të jenë të rrezikuar me marrjen e një infeksioni të ri.
Gjatë një interviste të 3 dhjetorit në Good Morning America të ABC-së, drejtoresha e CDC-së, Dr. Rochelle Walensky, diskutoi rastet e Omicron që SHBA-të po shohin aktualisht.
Sipas Dr. Walensky, varianti është gjetur në pesë shtete tani: Kaliforni, Nju Jork, Minesota, Hawaii dhe Kolorado.
Hawaii ka raportuar një rast Omicron me një individ të pavaksinuar që ka përjetuar simptoma të moderuara. Por rastet në Kaliforni, Kolorado dhe Minesota u gjetën në mesin e pacientëve që ishin plotësisht të vaksinuar dhe kanë zhvilluar vetëm simptoma të lehta.
Në përgjithësi, Dr. Walensky tha se njerëzit e vaksinuar po goditen kryesisht me raste të lehta të Omicron.
“Ajo që mund të themi, në bazë të asaj që tregojnë këto raste, disa kanë sëmundje të lehtë, disa mund të kenë sëmundje më të rëndë, shumë prej tyre janë të vaksinuar dhe ajo që po shohim tani është se shumë nga njerëzit me sëmundje të lehtë ishin personat e vaksinuar”, shpjegoi ajo.
Deri më tani, këto të dhëna anekdotike ndjekin atë që po shihet në vendet e tjera. Individi i parë izraelit që u infektua me variantin Omicron ishte një kardiolog me të tre dozat i vaksinuar nga Tel Avivi, i cili përjetoi ethe, dhimbje të fytit dhe dhimbje muskujsh. “Nëse nuk do ta kisha vaksinën, ndoshta do të kisha përfunduar në spital,” tha Dr. Elad Maor për The New York Times.
Gjatë intervistës së Dr. Walensky për burimin ABC News, ajo vuri në dukje se shumica e infeksioneve COVID në SHBA tani për tani janë ende të tipit të variantit Delta. Disa ekspertë kanë parashikuar se varianti i ri do të pushtojë botën brenda tre deri në gjashtë muaj, por të tjerë kanë thënë se nuk besojnë se Omicron do ta anashkalojë fare Delta-në. Vetëm koha do ta tregojë, pasi duhet të mblidhen më shumë të dhëna dhe kërkime rreth variantit të ri – duke përfshirë mënyrën se si mund të ndikojë në vaksinat tona ekzistuese. /Gazeta Shneta/