Një aplikacion mobil i quajtur “Are You Dead?” po shënon rritje të madhe të popullaritetit në Kinë, duke u renditur si aplikacioni me pagesë më i shkarkuar në Apple App Store gjatë javës së parë të janarit.
I çmimit rreth 1 euro, aplikacioni synon të ofrojë siguri për personat që jetojnë vetëm, në një kohë kur shqetësimet për izolimin social dhe mungesën e kontaktit janë në rritje.
Aplikacioni funksionon në mënyrë të thjeshtë: përdoruesit duhet të konfirmojnë çdo ditë se janë mirë duke shtypur një buton të gjelbër.
Në rast se nuk kryhet asnjë verifikim për dy ditë radhazi, sistemi dërgon automatikisht një email tek personi i caktuar si kontakt emergjent.
Zhvilluesit e përshkruajnë aplikacionin si një “mjet të lehtë sigurie”, i dizajnuar për të krijuar një formë mbrojtjeje të padukshme për njerëzit që jetojnë vetëm, duke ofruar qetësi si për përdoruesit ashtu edhe për familjarët e tyre.
I lançuar fillimisht si aplikacion falas vitin e kaluar, “Are You Dead?” ka kaluar gradualisht në kategorinë me pagesë dhe aktualisht kushton 8 juanë.
Jashtë Kinës, aplikacioni njihet me emrin “Demumu” dhe ka hyrë në listën e aplikacioneve më të shkarkuara edhe në SHBA, Singapor dhe Hong Kong.
Sipas raportimeve mediatike, popullariteti ndërkombëtar i aplikacionit lidhet kryesisht me komunitetet kineze jashtë vendit.
Rritja e interesimit për këtë aplikacion përkon me shtimin e numrit të personave që jetojnë vetëm në Kinë. Sipas të dhënave të Institutit të Kërkimeve Beike, të cituara nga China Daily, deri në vitin 2030 pritet që 150 deri në 200 milionë qytetarë në Kinë të jetojnë vetëm./Gazeta Shneta/