Përdorimi i antibiotikëve ndryshon ndjeshëm nga një vend evropian në tjetrin dhe në disa shtete, madje është në rritje. Ekspertët e shëndetit publik po bëjnë thirrje për uljen e përdorimit të tyre, pasi rreziku nga rezistenca ndaj barnave po rritet.
Rezistenca antimikrobiale (AMR) ndodh kur mikroorganizmat, si bakteret apo viruset, evoluojnë dhe bëhen rezistentë ndaj ilaçeve ekzistuese, duke e bërë më të vështirë trajtimin e infeksioneve. Përdorimi i tepërt i antibiotikëve përshpejton këtë proces. Sipas të dhënave evropiane, AMR shkakton më shumë se 35 mijë vdekje çdo vit në Bashkimin Evropian, Islandë, Lihtenshtajn dhe Norvegji, shkruan burimi Euronews Health transmeton Gazeta Shneta.
Për këtë arsye, në vitin 2023 Këshilli i BE-së u kërkoi vendeve anëtare të ulin përdorimin e antibiotikëve dhe të sigurojnë që të paktën 65 për qind e tyre të jenë trajtime të linjës së parë.
Megjithatë, sipas Qendrës Evropiane për Parandalimin dhe Kontrollin e Sëmundjeve (ECDC), këto objektiva ende nuk janë arritur.
Në vitin 2024, në BE u përdorën mesatarisht 20.3 doza ditore antibiotikësh për çdo 1,000 banorë. Ky nivel është 2 për qind më i lartë se para pandemisë në vitin 2019 dhe dukshëm mbi objektivin e BE-së prej 15.9 dozash ditore deri në vitin 2030.
Dallimet mes vendeve janë të mëdha. Holanda ka nivelin më të ulët me 9.8 doza ditore për 1,000 banorë, ndërsa Greqia ka nivelin më të lartë me 29.9. Në shumë vende, përfshirë Austrinë, Belgjikën, Francën, Spanjën dhe Portugalinë, përdorimi i antibiotikëve është rritur që nga viti 2020.
Ekspertët theksojnë se nevojiten përpjekje më të mëdha për të kufizuar përdorimin e panevojshëm të antibiotikëve, për të përmirësuar diagnostikimin dhe për të parandaluar përhapjen e infeksioneve.
Edhe qytetarët mund të ndihmojnë duke përdorur antibiotikët vetëm sipas përshkrimit të mjekut dhe duke përfunduar të gjithë trajtimin e rekomanduar. Kjo është thelbësore për të frenuar rritjen e rezistencës ndaj antibiotikëve. /Gazeta Shneta/