Një studim i ri sugjeron se barnat për humbje peshe mund të ndihmojnë pacientët të rikuperohen më mirë pas një sulmi në zemër. Këto ilaçe, të njohura si agonistë të receptorit GLP-1, përdoren zakonisht për trajtimin e diabetit të tipit 2 dhe për uljen e peshës trupore, por studimet e fundit tregojnë se ato mund të kenë edhe përfitime të rëndësishme për shëndetin e zemrës.
Sipas studimit të publikuar në revistën shkencore “Nature Communications”, këto barna mund të përmirësojnë qarkullimin e gjakut në zemër dhe të zvogëlojnë rrezikun e komplikimeve pas trajtimit emergjent të sulmit në zemër, raporton Euronews Health transmeton Gazeta Shneta.
Studiuesit zbuluan se në pothuajse gjysmën e pacientëve që pësojnë infarkt, enët e vogla të gjakut në muskulin e zemrës mbeten të ngushtuara edhe pasi arteria kryesore është hapur gjatë trajtimit.
Eksperimenti, i udhëhequr nga studiuesja Svetlana Mastitskaya nga “Bristol Medical School”, tregoi se ilaçet GLP-1 mund të parandalojnë fenomenin e njohur si “no-reflow”, kur gjaku nuk arrin të depërtojë në disa pjesë të zemrës.
Këto barna ndihmojnë duke relaksuar qelizat muskulore rreth enëve të gjakut dhe duke i zgjeruar ato, gjë që përmirëson qarkullimin dhe zvogëlon dëmtimin e mëtejshëm të zemrës.
Studime të mëparshme kanë treguar gjithashtu se personat që përdorin këto ilaçe kanë rrezik më të ulët për sëmundje kardiovaskulare, si infarkti apo goditja në tru. Për shembull, në vitin 2024 autoritetet amerikane miratuan përdorimin e ilaçit semaglutide për të ulur rrezikun e këtyre sëmundjeve.
Megjithatë, ekspertët theksojnë se barnat nuk janë zgjidhja e vetme.
Një stil jetese i shëndetshëm – që përfshin ushqim të balancuar, aktivitet fizik, gjumë të mirë, shmangien e duhanit dhe menaxhimin e stresit – mbetet thelbësor për shëndetin e zemrës dhe mund të rrisë edhe më shumë përfitimet e trajtimeve moderne. /Gazeta Shneta/