Një dozë e katërt e vaksinës anti- COVID do t’u ofrohet banorëve të shtëpisë së të moshuarve dhe njerëzve të moshës 50-vjeç e sipër në Danimarkë brenda këtij viti, tha kryeministrja, të mërkurën.
Arsyeja e lëvizjes është një rritje e rasteve të variantit të koronavirusit BA.5 në Evropë dhe qeveria e Danimarkës thotë se dëshiron të lëvizë me shpejtësi për të shmangur kufizimet e mundshme ose një bllokim eventual, shkruan MedicalxPress përcjell Gazeta Shneta.
“Infeksioni ka qenë në rritje për tre javët e fundit,” tha kryeministrja Mette Frederiksen. “Kjo është arsyeja pse ne po veprojmë tani.”
Ajo shtoi se masat e shpejta kishin për qëllim kujdesin për të moshuarit dhe të cenuarit dhe për të shmangur bllokimin e spitaleve, mbylljet dhe kufizimet dhe për të mbajtur ekonominë në këmbë.
Javën e kaluar, varianti BA.5 përbënte 59% të rasteve pozitive, njoftoi Ministri i Shëndetësisë, Magnus Heunicke.
Që nga e mërkura, 1,958 raste u raportuan në Danimarkë dhe 249 njerëz u shtruan në spital.
“Këto janë shifra marramendëse, por janë shifra të ulëta në krahasim me atë që kemi provuar më parë”, tha Heunicke, duke shtuar se megjithëse varianti është më ngjitës, ai nuk shkakton sëmundje më të rënda.
Doza e katërt, fillimisht do t’u jepet atyre që jetojnë në shtëpi pleqsh duke filluar nga 15 shtatori dhe më pas atyre mbi 50 vjeç nga 1 tetori. Njerëzit e cenueshëm gjithashtu mund të marrin një vaksinë duke kontaktuar mjekun e tyre të përgjithshëm, tha kreu i Autoritetit Shëndetësor Danez, Søren Brostrøm.
“Gjithçka që bëjmë tani është të shmangim mbylljet,” tha Heunicke. /Gazeta Shneta/