Numri i grave që do të përballen me infertilitet pritet të arrijë në afro 80 milionë deri në vitin 2036, me rritjen më të madhe te gratë mbi moshën 35-vjeçare. Kështu thuhet në një studim të ri të publikuar në revistën shkencore The Lancet.
Studiuesit, të cilët analizuan të dhënat e studimit Global Burden of Disease 2023 që përfshin 204 vende dhe rajone, parashikojnë se rastet e infertilitetit te gratë e moshës 35 deri në 49 vjeç do të rriten nga rreth 53.6 milionë në vitin 2023 në gati 80 milionë deri në vitin 2036.
Sipas studimit, rritja më e theksuar pritet të regjistrohet te gratë e grupmoshës 35-39 vjeç.
Autorët theksojnë se kjo lidhet kryesisht me shtyrjen e lindjes së fëmijëve në moshë më të avancuar. Me kalimin e viteve zvogëlohet rezerva e vezëve dhe cilësia e tyre, duke ulur fertilitetin, rritur rrezikun e abortit spontan dhe ulur suksesin e metodave të riprodhimit të asistuar.
“Me plakjen e popullsisë dhe ndryshimet socio-ekonomike, numri i grave të ekspozuara ndaj infertilitetit të lidhur me moshën po rritet, duke e bërë këtë një çështje gjithnjë e më të rëndësishme për shëndetin publik”, shkruajnë autorët e studimit.
Analiza tregon se infertiliteti është rritur më shumë në vendet me nivel më të lartë zhvillimi ekonomik.
Ndërkohë, në shumë vende me të ardhura të mesme dhe ekonomi në zhvillim, rritja e rasteve lidhet me disa faktorë njëkohësisht: martesat në moshë më të vonshme, shtyrja e shtatzënisë, rritja e numrit të grave që përpiqen të mbeten shtatzëna në fund të të 30-ave ose në të 40-at, si dhe ndërgjegjësimi më i madh për problemet e fertilitetit.
Megjithatë, studiuesit vënë në dukje se në shumë prej këtyre vendeve testet dhe trajtimet e fertilitetit mbeten të kushtueshme ose të vështira për t’u siguruar, duke bërë që kërkesa për kujdes shëndetësor të rritet më shpejt sesa qasja në shërbime.
Biologia dhe ekspertja e fertilitetit, Rocío Núñez Calonge, e cila nuk ishte pjesë e studimit, tha se zgjerimi i trajtimeve të riprodhimit të asistuar nuk mjafton për të përballuar këtë problem.
Sipas saj, është e nevojshme të adresohen edhe faktorët socialë që çojnë në shtyrjen e prindërimit, si vështirësitë për balancimin e jetës profesionale me atë familjare, pasiguria ekonomike dhe mungesa e mbështetjes institucionale për çiftet që dëshirojnë të kenë fëmijë në moshë më të re.
Ekspertët rikujtojnë se infertiliteti nuk është vetëm problem i grave. Vlerësohet se një në gjashtë persona në botë do të përballet me infertilitet në një moment të jetës, ndërsa 8 deri në 12 për qind e çifteve në moshë riprodhuese përjetojnë vështirësi për të pasur fëmijë.