Tre deputetë të koalicionit qeverisës, Ekrem Mustafa, Fidan Jilta dhe Fitim Haziri kanë votuar kundër Projektligjit për Shëndetin Riprodhues dhe Fertilizimit të Asistuar. Projektligji ka dështuar të kalojë në mungesë të kuorumit.
Në mungesë të kuorumit, ka dështuar të votohet Projektligji për Shëndetin Riprodhues dhe Fertilizimin e Asistuar Mjekësor.
Projektligji, i cili ka hasur në kundërshtinë e disa deputetëve të koalicionit qeverisës, ka dështuar të kalojë në mungesë të kuorumit. Disa deputetë të Lëvizjes Vetëvendosje nuk kanë marrë pjesë në votim.
“Vetëm 59 deputetë po marrin pjesë në votim. Konsideroj se nuk e kemi kuorumin e mjaftueshëm, kështu që nuk po e përsërisim më”, tha kryetari i kuvendit, Glauk Konjufca.
Tre deputetë të koalicionit qeverisës, Ekrem Mustafa, Fidan Jilta dhe Fitim Haziri kanë votuar kundër projektligjit.
Eman Rrahmani dhe Fjolla Ujkani, të dy pjesë e Grupit Parlamentar të LVV-së, nuk kanë marrë fare pjesë në votim. Labinotë Demi-Murtezi, po ashtu pjesë e LVV-së, ka abstenuar në votim.
Ky ligj, kishte ngjallur debate të mëdha dhe kishte nxitur përçarje në mesin e deputetëve të Lëvizjes Vetëvendosje edhe gjatë hedhjes në votim në mars të këtij viti. Asokohe, ligji nuk kishte kaluar për shkak të kundërshtimit nga nëntë deputetë.
Deputetët që asokohe kishin votuar kundër ishin: Haxhi Avdyli, Burim Meta, Ekrem Mustafa, Fjolla Ujkani, Labinotë Demi-Murtezi, Arta Baralija, Bahrim Shabani, Erxhan Galushi, Duda Balje, Fidan Jilta.