Përballja me virusin COVID-19, ka bërë që të sulmohen edhe rrugët respiratore duke shkaktuar pneumoni virale pa kursyer as edhe një organ tjetër.
Doktoresha Shpresa Azemi – Shemsedini, nga KEG CLINIC specialiste e endokrinologjisë, në një prononcim për portalin “Familja Jonë”, sqaron diabetin mellitus si dhe mënyrën se si duhet të trajtohet.
Çka është diabeti mellitus?
Dr. Shpresa Azemi- Shemsedini / KEG Clinic: Diabeti mellitus është një sëmundje kronike që karakterizohet me rritjen e nivelit të sheqerit në gjak, si pasojë e çrregullimit të prodhimit të insulinës në organizëm.
Sa persona në botë mendohet se janë me diabet?
Dr. Shpresa Azemi- Shemsedini: Në bazë të statistikave të fundit mendohet se janë të diagnostikuar diku rreth 422 milion njerëz në botë d.m.th 1 në 11 persona (bazuar në statistikat e WHO). Diabeti dhe llojet e tij futen në grupin e rrezikut të lartë, të cilët mund të fitojnë komplikime serioze nëse infektohen me virusin COVID 19.
Cilat janë disa nga problemet që kanë pasur pacientët me diabet të cilët kanë qenë të infektuar me COVID-19?
Dr. Shpresa Azemi – Shemsedini: Pacientët me diabet kanë pasur indeks më të lartë të koagulimit të gjakut si dhe lirim të shtuar në plazmë të interleukinave të cilat fajësohen si shkaktarë të komplikimeve të shumta organike.
Në rast të infektimi me COVID-19, çfarë terapie duhet të fillohet?
Dr. Shpresa Azemi – Shemsedini: Tek pacientët me diabet mellitus të cilët janë të infektuar është e domosdoshme fillimi i terapisë insulinike, rrugë invazive e cila është treguar efikase dhe kërkon monitorim të vazhdueshëm, sidomos tek pacientët me komplikime akute.
Cili është mjekimi i duhur tek pacientët me diabet që kanë luftuar me COVID-19?
Dr. Shpresa Azemi – Shemsedini: Mjekimi i duhur tek pacientët që kanë diabet dhe kanë luftuar me COVID-19 ka rezultuar që jetë me ilaçet si insulina, basa dhe bollus.
Cilat janë rreziqet e pacientëve me diabet të infektuar me Koronavirus?
Dr. Shpresa Azemi – Shemsedini: Pacientët me diabet të infektuar me COVID-19, kanë pre dispozicion më të lartë për të pasur pneumoni të rënda dhe shok septik si komplikime kryesore të infeksionit viral.
Sidoqoftë, trajtimi i diabetit tashmë është i mundshëm, por tërhiqet vërejtja se ende ka nevojë për një edukim më të mirë të popullatës për të parandaluar sa më tepër këtë çrregullim në organizimin e njeriut. /FamiljaJonë/