Studimet e mëparshme kanë treguar se ushqyerja e shëndetshme dhe e balancuar mund të ndihmojë në uljen e rrezikut për zhvillimin e sëmundjes së Alzheimerit dhe formave të tjera të demencës.
Një nga modelet ushqimore më të rekomanduara është dieta bimore, e cila përqendrohet te konsumimi i perimeve, frutave, drithërave të plota, bishtajoreve, arrave dhe farave, duke kufizuar produktet me origjinë shtazore.
Megjithatë, jo çdo dietë bimore është automatikisht e shëndetshme. Nëse ajo përfshin ushqime të përpunuara, produkte të skuqura ose artikuj me përmbajtje të lartë sheqeri dhe kripe, përfitimet shëndetësore mund të humbasin.
Një studim i ri, i botuar në revistën shkencore “Neurology”, zbuloi se një dietë bimore jo cilësore mund të rrisë rrezikun për Alzheimer dhe lloje të tjera të demencës, shkruan burimi Medical News Today transmeton Gazeta Shneta.
Në këtë studim, morën pjesë rreth 93 mijë të rritur me moshë mesatare 59 vjeç, nga grupe të ndryshme etnike. Pjesëmarrësit plotësuan pyetësorë mbi ushqimin dhe u vlerësuan sipas cilësisë së dietës së tyre bimore. Studiuesit i ndoqën për afro 11 vjet.
Rezultatet treguan se personat që konsumonin më shumë ushqime bimore të shëndetshme kishin 12% më pak rrezik për demencë krahasuar me grupin me rezultatet më të ulëta.
Sipas studiuesve, cilësia e ushqimeve bimore është po aq e rëndësishme sa vetë fakti që dieta është bimore. Zgjedhja e ushqimeve natyrale dhe të papërpunuara mund të jetë një hap i rëndësishëm për ruajtjen e shëndetit të trurit edhe në moshë të shtyer. /Gazeta Shneta/