Pijet me sheqer dhe ato me ëmbëlsues artificialë shpesh merren si alternativa më të shëndetshme, por një studim i fundit tregon se të dyja mund të rrisin rrezikun për sëmundjen e mëlçisë yndyrore joalkoolike, e njohur si MASLD. Kjo sëmundje lidhet me akumulimin e yndyrës në mëlçi dhe mund të çojë në probleme më të rënda, përfshirë sëmundjet kardiovaskulare.
Studimi i bazuar në të dhëna nga UK Biobank me 103,251 pjesëmarrës, ka përcjellur individët për mbi 10 vite. Gjatë kësaj periudhe, 949 persona zhvilluan MASLD dhe 103 vdiqën për shkak të problemeve të mëlçisë.
Analiza tregoi se konsumimi i më shumë se një kanaçe pije në ditë nga çdo kategori lidhej me një rrezik më të lartë për MASLD. Pijet me sheqer rritën rrezikun me rreth 50%, ndërsa pijet dietike ose me pak sheqer me 60%, shkruan burimi Medical News Today transmeton Gazeta Shneta.
Studimi gjithashtu tregoi se pijet dietike lidhen me një rrezik më të madh për vdekshmëri të lidhur me mëlçinë, dhe ky efekt ishte i varur nga sasia – sa më shumë që konsumoheshin, aq më i lartë ishte rreziku. Përmbajtja e yndyrës në mëlçi u rrit për të dyja kategoritë e pijeve.
Zëvendësimi i 330 gramëve të këtyre pijeve me ujë çdo ditë – zvogëlonte rrezikun për MASLD, duke dhënë përfitime më të mëdha kur zëvendësoheshin pijet me sheqer.
Sipas Lihe Liu, autor i studimit nga Spitali i Parë i Bashkëngjitur i Universitetit Soochow, “pijet dietike shpesh konsiderohen të sigurta, por konsumimi i tyre i shpeshtë lidhet me rreziqe për shëndetin e mëlçisë, duke sfiduar perceptimin se janë alternativa të shëndetshme për pijet e ëmbla”. /Gazeta Shneta/