Një studim i ri tregon se ndjekja e një diete mesdhetare lidhet me rrezik më të ulët të simptomave të depresionit, veçanërisht tek gratë e moshuara.
Hulumtimi, i publikuar në “British Journal of Nutrition”, zbuloi se gratë që e ndiqnin nga afër këtë dietë kishin rreth 60% më pak gjasa të përjetonin depresion. Kjo lidhje nuk u vërejt te meshkujt, raporton Medical News Today transmeton Gazeta Shneta.
Studimi italian “NutBrain” përfshiu 798 pjesëmarrës (473 gra dhe 325 burra) të moshës 65–97 vjeç.
Pjesëmarrësit iu përgjigjën një pyetësori ushqimor dhe u vlerësuan për depresion përmes një shkalle të standardizuar.
Në total, 19.8% raportuan simptoma depresioni – përfshirë 27.9% të grave dhe vetëm 8% të burrave.
Studiuesit vunë re një lidhje të fortë midis konsumimit të peshkut të freskët (jo të konservuar) dhe reduktimit të depresionit.
Ngrënia e tre ose më shumë racioneve peshku në javë uli rrezikun me 62%.
Po ashtu, marrja e acideve yndyrore të pangopura nga ushqime si vaji i ullirit, arrat dhe avokadot lidhej me rrezik më të ulët të depresionit.
Ekspertja Michelle Routhenstein tha se këto gjetje janë interesante, duke pasur parasysh se faktorët biologjikë të përfshirë – si mungesa e vitaminës D – zakonisht nuk janë të lidhur drejtpërdrejt me gjininë.
Megjithatë, përhapja më e lartë e depresionit tek gratë sugjeron një nevojë më të madhe për ndërhyrje parandaluese në këtë grup. /Gazeta Shneta/