Konkursi për përzgjedhjen e kandidatëve për infermierë të përgjithshëm në Spitalin Regjional të Gjakovës si duket nuk po ecë mbarë.
Në fund të tetorit kandidatët u kthyen në shtëpi pak minuta para se të filloj testi me shkrim pasi që testi u anulua dhe askush deri më tani nuk i ka treguar arsyet e anulimit të tij.
Me të anuluar testin i ndryshuan komplet anëtarët e komisionit për përzgjedhjen e kandidatëve.
Aktualisht kryesues i komisionit është Jeton Vorfi dhe anëtarë janë Murat Kursoni nga administrata e Spitalit, Zyrtare e Personelit, Elisa Juniku, Delvina Bobani- infermiere e mamisë, Edmond Arapi përfaqësues nga ShSKUK si dhe drejtor i infermierisë, Arbër Puzhegu.
Ndërsa, më parë kryesues i Komisionit ka qenë Pjetër Kola dhe anëtarë kanë qenë Violeta Kërleshi dhe Shpresa Deva – nga spitali si dhe Sali Bllaca dhe Jehona Vasolli përfaqësues nga ShSKUK.
Por, kush vendosi që në krye të komisionit të vij Jeton Vorfi, ish- asambleist në Komunën e Gjakovës nga partia Alternativa e Mimoza Kusari-Lilës.
Gazeta Shneta e ka telefonuar Jeton Vorfin, i cili tregon se emri i tij është propozuar në Ministri të Shëndetësisë.
“Nuk e di pse kanë vendos me ndryshu komisionin, mua vetëm më ka ardhë urdhëresë, por çka ka ndodh unë nuk e di – ministria (e shëndetësisë) ka vendosur”, e konfirmoi ai për Gazetën Shneta.
Përzgjedhja e kryesuesit dhe anëtarëve të komisionit bëhet direkt nga drejtori i spitalit- në këtë rast drejtori të Spitalit Rajonal në Gjakovës, Jeton Zararit dhe jo nga Ministria e Shëndetësisë.
Përzgjedhjen e Vorfit nga Ministria e Shëndetësisë e mohon edhe kjo e fundit.
“Na lejoni që të ju informojmë se Ministria e Shëndetësisë nuk cakton komisione e as anëtar të komisionit në procese rekrutimi që zhvillohen në kuadër të njësive të ShSKUK-së”, thuhet në përgjigjen e MSH-së adresuar në Gazetën Shneta.
Gazeta ka telefonuar përsëri, kryesuesin e Komisionit, i cili sqaron se propozimi për të qenë në krye të komisionit është bërë nga drejtori Zarari tek Ministria e Shëndetësisë.
“Drejtori më tha është anuluar komisioni i kalun dhe është diskutu për ty dhe e kanë marrë miratimin që ti me qenë kryesues. Drejtori (Jeton Zarari) më tha është bërë propozim emri yt në ministri (të shëndetësisë)”, tregoi ai gjithashtu.
Gazeta ka tentuar të marrë një deklaratë nga drejtori i spitalit, Jeton Zarari, mirëpo i njejti nuk është përgjigjur në pyetje e adresuara në email dhe mesazhe si dhe nuk i është përgjigjur thirrjeve. /Gazeta Shneta/
Konkursi për infermierë në Spitalin e Gjakovës, në moment të fundit anulohet testi me shkrim