Ditë më parë, në mediat vendore dhe ato të Shqipërisë qarkulluan informacionet se qumështi i prodhuar nga “Lufra” dhe “Erzeni” është cilësuar se përmban salmonellë.
Agjencia e Ushqimit dhe Veterinarisë ka konfirmuar se në Kosovë nuk ka importe të qumështit nga këto dy kompani.
Në një deklarim për IndeksOnline, zëdhënësi i AUV-it, Lamir Thaçi, deklaroi se nga këto dy kompani importohen vetëm produkte të fermentuara si: jogurti, dhalla, kosi, e të tjera, e që iu nënshtrohen kontrolleve të rregullta dhe testohen sipas planit të kontrolleve zyrtare dhe mostrimit.
“Këto kanë të paraparë mundësinë e ndryshimit bazuar ne analize te rrezikut. Aktualisht i kemi ngrite masat e kontrollit për qumësht dhe produkte te qumështit ne fushën e sigurisë ushqimore në import”, deklaron Thaçi.
Ai thotë se AUV-i ka inspektuar edhe depon e subjektit distributor, ku janë marrë dy mostra të paketuara nga qumështorja “Lufra”.
“Si AUV nuk kemi pranuar ndonjë ankesë, por si dyshime te ngritura kemi vetëm publikimet e lajmeve në media. Dje është inspektuar depoja e subjektit distributor dhe janë marrë dy mostra të paketuara nga qumështorja Lufra, të cilat janë dërguar për analiza në Aflatoksin” përfundoi ai.