21 marsi është dita botërore e personave me Sindrom Down. Kjo datë e rëndësishme për këtë komunitet është shënuar edhe në Kosovë.
Me dhjetra persona së bashku me Presidentën e vendit, Vjosa Osmani, sot kanë marshuar në sheshet e Prishtinës me moton “Ec me këpucët e mija”.
Foto:Gazeta Shneta 21.03.2022
Foto: Gazeta Shneta 21.03.2021
Pak para përfundimit të marshit, Osmani iu drejtuar mediave për të dërguar mbështetjen e saj tek të gjithë komunitetit i personave me Sindrom Down.
Presidentja tha se janë marrë disa hapa të vegjët “të cilët duhet të bëhen të mëdhenj”
“Është e domosdoshme që për të gjitha kushtet që ata kanë nevojë t’i ofrojmë si institucione. Jemi në hapa të parë kërkohet shumë më shumë punë, por do të bëjmë më shumë, gjithçka që është në duart tona dhe në kompetencat tona”, tha ajo para të pranishmëve.
Në anën tjetër, pjesë e këtij marshi ishte edhe drejtoresha e Organizatës “Sindrom Down Kosova”, Sabahate Hajdini Beqiri, e cila theksoi se personat me Sindrom Down kanë nevojë për më tepër mbështetje.
“Personat me Sindrom Down kanë nevojë për mbështetje dhe për realizimin e drejtave të tyre. Personat me Sindrom Down dhe familjarët e tyre përballën çdo ditë më sfida të ndryshme”, thotë ajo.
Në sheshet e Prishtinës gjithasht janë paraqitur edhe disa nga punimet e personave me Sindrom Down në bashkëpunim me Organizatën joqeveritare “Sindrom Down Kosova”
Çka është Sindrom Down?
Secila vezë dhe spermatozoid kanë nga 23 kromozome. Në momentin e fekondimit ato takohen për tu bashkuar në një embrion me 46 kromozome.
Një person me Sindromën Down ka një kromozom më shumë në ciftin e 21-të, duke bërë kështu që të ketë 47 kromozome gjithsej.
Sindroma Down nuk është një sëmundje por një çrregullim kromozomik.
Kjo sindromë e shoqëron fetusin që në ngjizje të tij e përgjatë gjithë jetës. Nuk ka një shkaktar shkencërisht të vërtetuar të këtij ndryshimi të kromozomeve në numër.