Qendra Klinike Universitare e Kosovës ka mbetur me dy anesteziologë më pak. Dy specialiste të anesteziologjisë e kanë lënë punën në Klinikën e Anestezionit në QKUK.
Dr. Venera Agani dhe Dr. Sebahate Gashi kanë dhënë dorëheqje nga pozitat e tyre si specialiste të anestezionit në Qendrën Klinike Universitare. Lajmin e ka konfirmuar drejtori i klinikës Dr. Gazmend Spahija, shkruan Gazeta Shneta.
“Po mund t’ju konfirmoj se dy koleget e lartcekura kanë shkëputur kontratën me KAMI-in. Dy kolegë të tjerë pritet të dalin në pension poashtu këtë vit”, ka bërë të ditur Spahija.
Venera Agani ka thënë se arsyet që ka hequr dorë nga puna në QKUK tashmë janë të njohura, për shkak të kushteve të punës dhe pagave të ulta.
“Unë që dy vite nuk kam kujdestaru për shkak të problemeve shëndetësore. Edhe orari i paraditës ka qenë shumë i ngarkuar, sidomos në këtë kohë. E di që kemi mungesë të anesteziologëve. Kam kërkuar pushim pa pagesë por nuk më kanë pranuar. Unë punojë që 25 vite dhe në vend se të shkojmë duke i përmirësuar kushtet, ato vetëm se po përkeqësohen. Nuk kam mundur të vazhdojë më tutje edhe për shkak të çështjeve personale”, ka thënë Agani. Ajo ka bërë të ditur se do të vazhdojë të punojë në sektorin privat.
Gazeta ka kontaktuar edhe me Sebahate Gashin, por e njëjta nuk i është përgjigjur thirrjeve.
Spahija ka thënë se në këtë situatë do të mbesin me 49 anesteziolog të cilët mbulojnë më shumë se 30 salla të operacionit në QKUK, duke përfshirë njësitë e kujdesit intensiv dhe mbajtjen e kujdestarive.
Spahija ka thënë se ndërkohë janë në pritje të procedurave për punësimin e katër anesteziologëve të rinj, por sipas tij kjo sërish do të jetë e pamjaftueshme.
Kujtojmë se edhe në vitin 2020 pesë anesteziologë e kanë lënë punën në QKUK. Numri i anestezistëve dhe intensivistëve në Kosovë është mjaft i vogël për shkak të mungesës së konkursit për specializime nga viti 2016 deri në vitin 2021.
Konkursi i fundit është shpallur në kohën kur ministër i Shëndetësisë ka qenë Armend Zemaj nga LDK. Në këtë konkurs u pranuan rreth 1500 specializantë të rinj, për çka Zemaj u kritikua për shkak të mungesës së kapaciteteve në spitale për edukimin e tyre. /Gazeta Shneta/