Rreziqet nga zjarret pyjore nuk përfundojnë me shuarjen e flakëve. Sipas një studimi të ri, banorët që kthehen në shtëpitë e tyre pas zjarreve mund të ekspozohen pa e ditur ndaj kimikateve të rrezikshme dhe potencialisht kancerogjene.
Viti i kaluar u shënua nga zjarre shkatërruese në Evropë, ku u dogjën mbi një milion hektarë tokë – katër herë më shumë se në vitin 2024. Mbi 1,800 zjarre pyjore çliruan më shumë se 38 milionë tonë CO₂, ndërsa Portugalia dhe Spanja përbënin mbi dy të tretat e dëmeve totale. Ekspertët theksojnë se ndryshimet klimatike i kanë bërë këto zjarre shumë më të mundshme, shkruan burimi Euronews Health transmeton Gazeta Shneta.
Studimi, i botuar në “Environmental Science & Technology Letters”, analizoi pasojat e zjarreve të vitit 2025 në Qarkun e Los Anxhelosit, ku u shkatërruan mbi 18,000 shtëpi dhe u evakuuan rreth 200,000 persona.
Shkencëtarët nisën mbledhjen e mostrave të ajrit gjatë zjarrit dhe vazhduan edhe 18 ditë pas shuarjes së tij.
Rezultatet treguan se nivelet e përbërësve organikë të paqëndrueshëm (VOCs) ishin më të larta pas zjarrit sesa gjatë djegies, veçanërisht në shtëpitë e pabanuara brenda zonave të prekura.
Këto substanca, përfshirë benzenin dhe toluenin, lidhen me irritime afatshkurtra, dëmtime organesh dhe rritje të rrezikut për kancer.
Studiuesit rekomandojnë ajrosje të rregullt të ambienteve, përdorimin e sistemeve të ventilimit me filtra të nivelit MERV 13 ose më të lartë, si dhe pastrues ajri me filtra qymyri, për të ulur ekspozimin dhe për të mbrojtur shëndetin e banorëve pas zjarreve. /Gazeta Shneta/