Këshilli Etik i Odës së Mjekëve të Kosovës e ka gjetur fajtor drejtorin e Shërbimit Spitalor Klinik Universitar Dr. Basri Sejdiun, për mospërdorimin e faksimiles zyrtare të internistit të lëshuar nga OMK.
Përveç Sejdiut, edhe drejtori i Shërbimit Kardiokirurgjik Dr. Tefik Bekteshi është gjetur fajtor poashtu për të njëjtën arsye. Të dy janë gjobitur me nga 1 mijë euro për mos përdorimin e faksimileve të lëshuar nga Oda e Mjekëve të Kosovës, shkruan Gazeta Shneta.
Gazeta ka mësuar nga burime brenda Odës se vendimi i Këshillit Etik është marr gjatë ditës së djeshme dhe pritet të zyrtarizohet dhe t’iu dërgohet palëve. Sejdiu në një përgjigje për Gazetën ka thënë se nuk është në dijeni për këtë vendim, por ka shtuar se posedon vendimin valid të kardiologut të lëshuar nga Ministria e Shëndetësisë.
“Nga Ministria e Shëndetësisë e kam vendimin valid të kardiologut dhe po pres që Oda e Mjekëve me zbatua këtë vendim”, ka deklaruar Sejdiu. Në anën tjetër Bekteshi nuk i është përgjigjur thirrjeve të Gazetës në telefon në disa tentime për të marr një qëndrim nga ana e tij për këtë çështje.
Kujtojmë se Oda e Mjekëve i kishte çuar në Këshillin Etik Sejdiun dhe Bekteshin në dhjetor të vitit të kaluar për mospërdorimin e vulave të internistit, por ato të kardiologut.
Sejdiu dhe Bekteshi i përkasin grupit të mjekëve që kanë përfituar thirrjet subspecialistike me vendimin kontrovers të ish-ministrit të Shëndetësisë Ferid Agani për barasvlerësimin e përvojës së punës me tituj specialistik. Një nga këto vendime të Aganit e kishte hedhur poshtë Gjykata e Apelit në dhjetor të vitit 2018. /Gazeta Shneta/