Me rritjen e përdorimit dhe qasjes ndaj kanabisit në Europë, studiues nga Mbretëria e Bashkuar kanë propozuar udhëzime të reja për përdorim më të sigurt, të ngjashme me rekomandimet që ekzistojnë për konsumimin e alkoolit.
Studimi, i kryer nga Universiteti i Bath-it dhe i publikuar në revistën “Addiction”, sugjeron vendosjen e një kufiri javor bazuar në përmbajtjen e THC-së, substanca kryesore psikoaktive e kanabisit, shkruan burimi Euronews Health transmeton Gazeta Shneta.
Sipas studiuesve, të rriturit nuk duhet të konsumojnë më shumë se tetë njësi THC në javë. Kjo korrespondon me rreth 40 miligramë THC ose afërsisht një të tretën e një grami kanabis bimor.
Një njësi THC përfaqëson pesë miligramë THC. Autorët theksojnë se përdoruesit duhet të fokusohen te sasia e THC-së së konsumuar dhe jo vetëm te frekuenca e përdorimit.
“Qëllimi ynë përfundimtar është reduktimi i dëmit. Niveli i vetëm plotësisht i sigurt i përdorimit të kanabisit është mos-përdorimi,” deklaroi Rachel Lees Thorne, autorja kryesore e studimit.
Megjithatë, udhëzimet synojnë të ndihmojnë personat që nuk duan ose nuk mund ta ndërpresin përdorimin, duke ulur rrezikun për probleme shëndetësore.
Studiuesit zbuluan se rreziku për çrregullim nga përdorimi i kanabisit (CUD) rritet ndjeshëm mbi tetë njësi THC në javë dhe bëhet edhe më i lartë mbi 13 njësi. Ky çrregullim prek rreth 22% të përdoruesve të rregullt dhe lidhet me varësi, dëshirë të fortë për konsum dhe vështirësi në jetën e përditshme.
Kanabisi mbetet droga ilegale më e përdorur në Europë, me rreth 24 milionë përdorues çdo vit.
Ekspertët theksojnë se, me ndryshimet ligjore në disa vende europiane, informimi i saktë i publikut është thelbësor për reduktimin e rreziqeve shëndetësore. /Gazeta Shneta/