Një studim i ri ka shqyrtuar nëse suplementet e ekstraktit të kakaos ndikojnë në inflamacionin e lidhur me moshën, i cili luan rol të rëndësishëm në zhvillimin e sëmundjeve kardiake dhe të tjera kronike.
Rezultatet treguan se marrja ditore e 500 mg ekstrakt kakao për dy vjet ngadalësoi rritjen e një markeri kryesor të inflamacionit. Përfitimet ishin më të dukshme tek individët që kishin nivele më të larta inflamacioni në fillim të studimit, shkruan Medical News Today transmeton Gazeta Shneta.
Ndërsa njerëzit plaken, ata kanë më shumë gjasa të zhvillojnë sëmundje kronike, përfshirë ato kardiometabolike, neurodegjenerative dhe të kockave.
Sipas CDC, deri në vitin 2060 një në katër persona do të jetë mbi 65 vjeç, duke e rritur nevojën për strategji parandaluese.
Studiuesit nga “Mass General Brigham”, përqendruan vëmendjen tek suplementet e kakaos për shkak të përmbajtjes së lartë me flavanole — antioksidantë bimorë të njohur për efektet e tyre në shëndetin kardiovaskular. Ky studim synoi të analizonte ndikimin afatgjatë të tyre në biomarkerët e inflamacionit.
Pjesëmarrësit ishin gra mbi 65 vjeç dhe burra mbi 60 vjeç. Studiuesit morën mostra gjaku në fillim, pas një viti dhe pas dy vitesh, për të matur tre biomarkera inflamacioni, një proteinë anti-inflamatore dhe një proteinë që ndërmjetëson sistemin imunitar.
Gjetjet sugjerojnë se suplementet me ekstrakt kakao mund të ndihmojnë në uljen e inflamacionit kronik dhe të kontribuojnë në parandalimin e sëmundjeve të lidhura me plakjen, sidomos të atyre të zemrës. /Gazeta Shneta/