Një ekip multidisiplinar i mjekëve në QKUK kanë kryer sërish një operacion të rrallë për ngjitjen e krahut të amputuar tek një pacientë 36-vjeçar.
Mjekët e Qendrës Klinike Universitare edhe një herë kanë treguar se mund të kryejnë suskesshëm intervenime të vështira me ekipe multidisiplinare, sikurse ndodh edhe në qendrat e avancuara në botë, shkruan Gazeta Shneta.
Ekipi i mjekëve i kryesuar nga kirurgët vaskularë Lulzim Vokrri, dhe Luan Jaha, Neurokirurgji: Nehat Halili dhe Art Deva, Plastike: Korab Berisha dhe Petrit Spahiu, anestezion: Valon Kadriu, kanë trajtuar me sukses një pacient 36-vjeçar me krahun e djathtë të këputur pothuajse plotësisht.
Pacienti A.R, 1987, e ishte paraqitur para gjashtë ditësh në Emergjencën e QKUK-së me krahun e djathtë pothuajse komplet të prerë (amputim subtotal), gjatë një aksidenti me xham në shtëpi.
Nga SHSKUK kanë njoftuar se mjekët kirurgë, me punë ekipore, (ekipa e Kirugjisë Vaskulare që e udhëheqi operimin, e Kirurgjisë Plastike dhe Rekonstruktive dhe ekipa e Neurokirurgjisë), bashkë me Anesteziologë dhe pjesën tjetër të ekipit operativ, kanë kryer operimin te një pacient i moshës 36 vjeç, duke i realizuar dy bypasse (urëzime), në pjesën e mesme të arteries brahiale dhe venës basilica të djathtë, (arterie kryesore që ushqen dorën me gjak dhe vena sipërfaqsore, e cila e kthen gjakun në zemër).
“Si graft për rekostrukcion të enëve të lëndura, ekipa përdori venën sipërfaqësore të këmbës së djathtë; (Vena saphena magna). Po ashtu ekipa operative, kishte përkujdesur dy venat brahiale dhe kishte bërë hemostazë korrekte. Ekipa e Neurokirurgjisë e bëri qepjen e nervit të dorës, ndërsa ekipa e Kirurgjisë Plastike, bëri qepjen e muskujve dhe të tendinave”, thuhet në njoftimin e SHSKUK-së.
Pas operacionit janë kryer ekzaminimet kontrolluese, ku është konstatuar se intervenimi kirurgjik ishte kryer me sukses të plotë dhe pacienti pas 6 ditë hospitalizimi në Kirurgji Vaskulare, u lirua në shtëpi në gjendje shumë të mirë shëndetësore, kanë bërë të ditur nga SHSKUK.
Një rast i ngjashëm u trajtua me sukses edhe para disa muajsh në QKUK. /Gazeta Shneta/
Këta janë kirurgët që e punuan rastin e rrallë të ngjitjes së dorës në QKUK