Së paku dy familjare dhe një e afërt e mjekëve janë punësuar në Spitalin e Mitrovicës në konkursin për mami.
Spitali i Mitrovicës javën e kaluar ka shpallur rezultatet e konkursit për pranimin e tri mamive me diplomë bachellor dhe dy me shkollë të mesme, shkruan Gazeta Shneta.
Në konkursin Mami Bachellor janë pranuar dy infermiere të cilat janë bashkëshortet e dy punëtorëve të Spitalit të Mitrovicës, përkatësisht një mjeku anesteziolog dhe një tekniku të anestezionit.
Është fjala për kandidatet M.B. e cila është bashkëshorte e mjekut A.B. dhe L.P e cila është bashkëshortja e teknikut Xh.P.
Kandidatja e tretë N.G. del të jetë e afërt me njërin nga anëtarët e Komisionit të Pranimit e cila shihet së bashku me të në një darkë në një foto të publikuar në facebook.
Ndonëse mamitë janë infermiere të përgjithshme, Spitali i Mitrovicës e ka shpallë ndaras një konkurs tjetër për infermiere me shkollë të mesme dhe bachellor.
Për këtë çështje dhe për dyshimet e lidhjeve familjare, menaxhmenti i SP Mitrovicës nuk i ka kthyer përgjigje Gazetës. Në këtë spital edhe në të kaluarën është raportuar për punësime me ndikime familjare të mjekëve dhe zyrtarëve tjerë. /Gazeta Shneta/